“Jeneral Lere Husu Reforma”

.

Jornal Independente - Kuarta-feira, 21 Agusto 2013

Komandante Jeral FALINTIL-Forsa Defesa Timor-Leste (F-FDTL), Major Jeneral Lere Anan Timur sei husu reforma aan husi instituisaun F-FDTL iha tinan 2017, tanba iha tinan, nia idade to’o ona tempu atu hetan reforma.

“Iha 2017 hau sei hakat ba iha reforma, maibe la hatene politiku nain sira simu ka lae, no joven sira preparadu ka lae,” dehan Xefe Estadu Maior, iha Suai, Sabadu (17/8).

Nia hatutan, bainhira hetan reforma Jeneral Lere laiha ambisaun atu envolve aan iha vida politika hodi kaer kargu seluk, maibe hakarak onsentra ba hakerek istoria durante tempu rezistensia nia.

Nia dehan, agora ne’e tenke prepara hakerek kedas ona se lae aban bain rua mak hakfodak hakerek istoria ne’e ulun ain hela. “Ita tenke hakerek ona para it abele rai hela ba jerasaun foun sira atu estuda se lae sira aban bain rua hanoin ukun aan ne’e ema mak fo deit la liu husi lta ne’ebe naruk,” hateten Lere.

Nia dehan, liu husi istoria ne’e mak bele lori jerasaun foun sira iha futuru iha nasionalizmu rasik ba nia rain se lae sira goza deit la hatene katak nasaun ne’e sosa ho ruin no ran.

.