“Funsionariu MAP Utiliza Ro Peskas Tula Pasazeirus”

,

Jornal Nacional Diario - Kuarta-feira, 21 Agusto 2013

Ro Peskas Ministeriu Agrikultura no peskas (MAP) nian ne’ebe mak durante ne’e lokaliza tiha mai Atauro, la’os atu halo serviso ba interese agrikultor nian, maibe utiliza fali hodi tula pasajeirus hodi ten lukru.

Administrador Sub Distrito Atauro, Manecas da Conceicao Soares, liu husi nia diskursu iha serimonia tomada de pose ba estrutura grupu Kooperativas Peskas Atauro, sabadu (17/8), klarifika katak, nia deskontenti tebes ho hahalok Funsionariu Publiku MAP nian iha Atauro, tanba utiliza fali ro peskas hodi tula pasazeirus.

 “Deskulpa laos hau kesar, hau nia obrigasaun atu koalia tanba oras ne’e dadaun hau halo ona despaisu ida atu bolu atensaun ba funsionariu hotu-hotu ne’ebe mak la hala’o kna’ar ho diak inklui peska la fo atensaun ba peskador sira, hau la hatene ate data peskador ne’e hira, hau hatene pobu deit, tanba funsionariu peska la halo nia atividades, la kontrola peskador sira, simu tiha ro peskas utiliza ba tula pasazeirus, grupu sira la’o namkari hela deit, ne’e situasaun ne’ebe hasoru iha terenu,” informa manecas da Conceicao Soares.

Iha oportunidade ne emos, Manecas tatoli hela ba asesor MCIA no Sekretariu Estado Peskas atu tempu badak bele koloka funsionariu tekniku ne’ebe mak iha kapasidade bele kontrola aktividades peskas nian.

 “Ita boot sira nain rua, hanesan asesor ba MCIA no Sekretariu Estado peskas, iha tempu badak ne’e ami husu atu koloka funsionariu tekniku ne’ebe mak iha kapasidade duni para atu kontrola aktividade peskas ninian,” Manecas hateten.

Autoridade ba sub Distritu Aatauro ne’e dehan, durante ne’e nia mak sempre hasoru malu ho Xefi Suku no Xefi Aldeia sira ho peskador, maibe informasaun ne’ebe nia simu mak funsionariu peskas la iha, fulan-fulan hein ba simu osan deit.

Ho informasaun ne’ebe mak Administrador Sub Distrito Atauro nee fo sai mak, Konsellu Konsultivu MAP, Teofelio Maia, sei hato’o ba iha leten hodi nune’e atu haree, meus saida mak sei halo atu nune’e funsionariu bele halo ho diak liu iha fatin ida ne’e.

“Karik, hato’o iha tempo badak ida ne’e mos hau bele mai pasa informasaun liu husi viatelefone ba adiminstrasaun sub Distrito Atauro,” responde teofilo. Ho Problema no dezafiu neebe mak peskadores Atauro hasoru, Teofilo dehan, odamatan MAP nian nakloke ba komunidade tomak, liu-liu ba komunidade ne’ebe mak hela iha area kosteru.

,