Sai Governu atu ukun. Sai ukun nain atu servi

.

Mari Alkatiri - Facebook - 9 de agosto de 2013

Sai Governu atu ukun. Sai ukun nain atu servi. 

Importanti atu hatene ukun tuir dalan ida nebe'e? Atu servi los se'e? 

Dala barak, bainhira ita tun ba Povu tanba ita prometa dehan ita presiza povu nia partisipasaun iha prosesu dezenvolvimentu tomak. Maibe'e sa'ida maka akontese maka ita presiza deit povu nia votu atu manan deit iha eleisaun. 

Ita halo promesa oin2, uza meius hotu2 atu kasa ka peska povu nia votu. Maka povu fo fiar mai ita karik, ita halo festa no dehan ita manan ona legitimidade demokratika atu ukun. 

Sai ukun nain tiha ona ita haluha tiha katak konfiansa ida nebe'e povu fo mai ita atu ita bele kumpri ita nia promesa, atu ita bele servi ho diak povu ida ne'e duni. Nune'e, legitimidade ida nebe'e ita simu, nia nain maka povu tomak. Ita la os na'in ba ida ne'e. Ita hetan fiar. Legitimidade ida nebe'e simu ita presiza atu hametin tan lor-loron ho ita nia sevisu atu uza povu nia osan atu hadia povu nia vida. Ita la simu legitimidade atu habokur deit ita nian, atu hadok tan ita nia an husi povu nia susar. 

Bainhira ita la iha kapasidade, kbit atu hametin tan legitimidade ida ne'e ho ita servisu atu servi diak liu ita nia povu, ita lakon legitimidade ida ne'e iha dalan klaran. Nia konsekuensia ida deit: Povu lakon konfiansa mai ita. Povu dada fila fali legitimidade hanesa nia rikusoi rasik. 

Tanba ne'e Governu ida nebe'e deit tenki iha konsiensia ba realidade ida ne'e. Bainhira ita lakon konsiensia ba realidade ida, ne'e demokrasia sai falijogu ida, ulun tun ain sa'e. Maka hahalok hanesa ne'e sai fali ita nia pratika, legitimidade mukit ona. Ita hela deit ho kumplisidade entre ita rasik atu defende malu deit, atu subar ida2 nia sala, atu perdua malu deit. 

 Bainhira ita tama iha dilema ida ne'e, ita buka ita kolega nia sala. Iha sorin fali, ita nia kolega mos buka ita nia sala. La os ba atu ajuda malu atu mann konsiensia ka atu hadia. Maibe'e atu dehan deit: Ita hotu sala. Diak liu ita defende malu. Labele defende malu karik, diak liu ita nonok deit. Lalika akuza malu. Se lae ita sei monu hotu. 

Ho situasaun ida hanesa ne'e ita lalika espera tan katak buat ruma sei muda. Ho situasaun hanesa ita presiza atu fila fali ba Istoria atu bele loke dalan atu REMODELA ita nia mentalidade. 

Hakuak bot ida ba Povu Maubere tomak. 

A Luta Kontinua!

.