“Merenda Eskolar Paradu Iha EBF Fatumeta, PR Triste”

.

Jornal Independente - Sesta-feira, 16 Agusto 2013 

Estudante sira iha ensino Baziku Filial Fatumeta No 1, Dili, hahu husi inisiu Agustu to’o ohin loron la hetan ona merenda eskolar tanba laiha orsamentu husi Ministeriu edukasaun hodi bele sosa modo sira,” dehan Diretor Eskola. 

Xefe EBF No 1, Flaviano da Costa dos santos, dehan tuir informasaun nia rona katak, programa merenda eskolar segundu siklu tenke paradu iha fulan ida ne’e tanba Ministeriu Edukasaun seidauk iha orsamentu. Parte eskola seidauk hatene klaru data alokasaun orsamentu husi Ministeriu kompotente hodi hahu fali programa fo hahan ba estudante sira,” dehan Flaviano. 

Nia dehan komesa fulan kotuk programa merenda eskolar la dun lao normal hanesan antes. Iha Junu programa lao diak, ne’ebe estudante sira ha’an husi segunda to’o sabadu, maibe iha Julu estudante sira haan deit husi segunda to’o sesta deit,” dehan Diretor eskola refere. 

Iha oportunidade ida ne’e, Flaviano mos informa kona ba difikuldade sira ne’ebe mak nia parte eskola hasoru durante ne’e, liu-liu prosesu aprendizazen. 

 Nia mos dehan tan katak, nia estudante sira barak mak sei tuur iha rai hoti tuir prosesu aprendizazen tanba iha eskola ne’e falta meja no kadeira. Entertantu, Prezidenti Republika (PR) Taur Matan Ruak foin dadauk ne’e distribui fasilidade eskola ba eskola Filial, Suku beremana Sub Distritu Turiskai, Distritu Manufahi, hodi nune’e bele ajuda situasaun aat ne’ebe eskola ne’e hasoru durante ne’e. 

“Hau hare estudante sira ne’e hau nia fuan kanek, hau foti inisiativa rasik, hodi oferese ekipamentus hanesan meja, kadeira, livru, lapijeiru ho Jornal balun ba estudante sira atu bele aprende,” dehan xefe Estadu hafoin entrega diretamente fasilidade sira ne’e ba eskola refere. 

Nune’e mos nia husu ona ba ekipa F-FDTL atu bele ajuda halo kadeira no meja ba eskola filial ida ne’e. Maske iha situasaun eskola la dun diak, Prezidenti Taur, fo motivasaun maka’as ba estudante sira atu estuda didiak, tanba futuru nasain iha sira nia liman. 

Foto de, Presidência da República de Timor-Leste - Facebook 

.