Dr. Mari Alkatiri: “Atensaun Estado Ba FALINTIL Lao Neneik”

.

Jornal Nacional Diario - Segunda-feira, 19 Agusto 2013

Fundador Forsa Armada Libertasuan Nasional Timor Leste (FALINTIL), Dr. Mari Alkatiri hatete katak, Estadu fo ona atensaun ba membru FALINTIL nebe fo an ba mate maibe atensaun ne’e sei lao neneik liu.

 “As-vezes ita lao lalais demais, atu lao lalais demais mos ita la hetan tanba kondisoens seidauk iha, asvezes ita fo meus demais depois ita laiha kapasidade atu halo manutensaun ba meus no rekursus sira ne’e, se ita la fo sala i ita fo sala nafatin, buat ne’e prosesu dezenvolvimentu ne’e hanesan ne’e duni,” Fundador FALINTIL, Dr. Mari Alkatiri deklara asuntu ne’e ba JNDiario wainhira fo ninia komentariu loron FALINTIL ba dala 38 ne’ebe sei selebra Tersa (20/8/2013) iha Betano.

Iha oportunidade ne’e Sekretariu Jeral (Sekjer) Partidu FRETILIN Mari Alkatiri hateten, nudar fundador FALINTIL senti orguilhu, tanba FALINTIL transforma ba forsas armadas mantein prinsipiu atu servi povu no nasaun ida ne’e.

 “Hau kontenti tanba FALINTIL agora trasforma fali Forsas Armadas Timor Leste ninian e maibe sira mantein sira ninia prinsipiu katak atu servi diak liu povu ida ne’e, ne’e mak halo hau kontenti, signifika luta ke ita halo durante tinan 24 ne’e la presuma (la saugate) ida, ita sei iha FALINTIL ita sei iha FRETILIN para atu defende nafatin povu ida ne’e,” Alkatiri afirma.

Eis Primeiru Ministru iha Primeiru Governu Konstitusional, Alkatiri akresenta liu tan katak, ho esperansa boot tinan 10 ba leten iha ona atensaun neebe diak husi Estado ba FALINTIL sira, maske iha tempu ne’ebe lao kleur.

 “Tinan 10 tan, tinan 20 tan sasan situasaun oin seluk ona, mais pronto kuandu komesa to’o tiha ona iha leten hakarak sa’e tan ne’e normal iha prosesu dezenvolvimentu iha rai hotu-hotu,” komenta Alkatiri.

.