PR Taur Matan Ruak: “Veteranus Labele Hadau Malu Projetu”

.

Jornal Nacional Diario - Kuarta-feira, 21 Agusto 2013 

Prezidenti Republika (PR) Taur Matan Ruak, apela ba veteranus atu hases-an husi aktu involvimentu negosiu hodi hadau malu projetus, tanba hahalok ne’e la diak ba veteranus ne’ebe hanesan heroi ba nasaun ida ne’e nian. 

 “Prezidenti Republika mos apela ba V Governu Konstitusional para labele fo apoiu ba inisiativa sira hanesan ne’e, tanba aktu ida ne’e kontra lei sira ne’ebe vigora iha ita nia nasaun, no aktu ida ne’e mos fo ezemplu aat ba ita nia jerasaun foun sira,” hateten Taur Matan Ruak iha nia diskursu ba aniversariu FALINTIL ba dala 38 no serimonia dezmobilizasaun Kombatentes Libertasaun Nasional Frenti Armada, Tersa (20/8) iha Betano Distritu manufahi. 

 Xefe ESatdu ne’e hatutan katak, hahalok veteranus ne’e sai preokupasaun boot ba nia, tanba veteranus hakat liu ona lina vermellu. “Iha okaziaun ida ne’e, hau atu dehan ba veteranus sira, veteranus sira balun involve-an iha negosiu no projeitu, Prezidenti da Republika hanesan komandante em xefi sente katak, ita boot sira hakat liu ona lina vermellu,” dehan PR Taur. 

Taur Matan Ruak mos husu ba veteranus sira atu tau iha konsiderasaun Prezidenti nia alerta, no tenki hakat tuir ona dalan ne’ebe admisivel iha sosiedade nia leet. 

“Husu mos ba Joven sira, ne’ebe prepara-an dadauk ona atu simu responsablidade bo’ot, tanba ne’e tenki mantein displina, espirito no nasuan nia hirakia no espiritu de misaun,” hateten Taur Matan Ruak. Nune’e, PR Taur mos hatutan tan katak,” Dezmobilizasaun ida ne’e, sai hanesan terseira vez ba estadu ida ne’e, tanba dezmobilizasaun ba segundu vez, hala’o depois de Timor-Leste independensia, Dezmobilizasuan primeira vez hala’o iha Aileu, bainhira Timor-Leste hari’I Forsas Armadas. 

Hatan ba kestaun ne’e, Sekretariu Estadu trata Asuntu veteranus, Julio Sarmento Metal-Malik kontra deklarasaun Prezidenti da Republika Taur Matan Ruak nian, neebe mak hateten, veteranu barak involve iha vida negosiu kontra lei ne’ebe vigora iha Timor-Leste (TL). 

 “Ida ne’e la kontra lei, tanba veteranus sira envolve iha projeitu eletrisidade hanesan i nome pesoal, maibe ho projeitu ne’ebe nia hetan la fo influensia ba dignidade veteranus,” esplika Meta Malik. 

Meta Malik afirma tan katak, projeitu ne’ebe veteranus sira hetan hanesan lori naran de’it, isin emprezariu sira mak koileta, laos veteranus sira.

.