“MS Investiga Ona Kazu Tratamentu Saude Ba Rai Liur”

.

Jornal Independente - Segunda-feira, 12 Agusto 2013 

Ministeriu Saude (MS) hala’o ona investigasaun ba kazu tratamentu saude pasiente ba rai liur, ne’ebe indika mosu nepotizmu. 

Vise Ministra saude (MS), Maria do ceu informa kestaun ne’e hodi responde perguntas jornalista kona ba preokupasaun pasiente sira ne’ebe hato’o ona rekomendasaun (rujukan) ba nia nu’udar Vice Ministra saude maibe hein to’o ohin loron seidauk hatuun despaixu to’o ikus pasiente rasik tenke fila ba uma ho kondiasaun grave. 

 “Ne’e hau la bele fo komentariu, tanba agora dadaun investigasaun lao hela, fo hela oportunidade baa mi investigador sira depois mak ita haree buat ne’e loos ka la loos, tanba ne’e mak hau la kohi fo komentariu,” dehan Maria. 

Deskonfia Vice Ministra saude ne’e halo nepotizmu hatuun despaixu lalais ba nia familia sidadaun estranjeiru hodi halo tratamentu iha rai liur (Indonesia), maibe rekomendasaun pasiente seluk nuudar mos veteranus sira budu deit iha Hospital Nasional Guido Valadares (HNGV). 

Veterana Joana Maria Dulce (Olirka), hateten katak, nia moras Mioma (Tumor) durante loron 10 halo tratamentu iha HNGV, hetan ona rujukan husi Junta Mediku iha HNGV ba halo tratamentu iha rai Liur (Bali), Indonezia, maibe to’o agora Ministeriu Saude seidauk hatuun despaixu ruma, tanba ne’e nia foti desizaun fila ba uma. 

“Hau hanesan pasiente iha HNGV, hanesan moras Mioma (Tumor), maibe iha fulan marsu hau baixa iha HNGV durante loron 10, iha momentu hau baixa hau hetan rujukan husi junta mediku sira husi HNGV, hetan rekomendasaun tuir prosedimentu ne’ebe mak iha, hau laos hakatak lu prosedimentu ne’ebe mak governu implementa, liu husi MS nian ne’ebe mak iha,” dehan nia ba Jornalista iha salaun CNE, Dili, foin lalais ne’e. 

Pasiente Dulce mos konsege halo pedidu diretamente ba Vice MS, Maria do Ceu, maibe nia foti dokumentu rujukan hodi fo dalan ba nia atu halo deit tratamentu iha HNGV. 

“Pior liu tan hau husik to’o semana rua, hau ba cek fali surat ne’e sira halo prosesa to’o tiha ona mai iha dirasaun Nasional Apoiu Servisu Hospital no enkaminhamentu (DNASHE), hau rasik ba fali iha dirasaun ne’eba sira dehan halo ona despaixu hodi fo orsamentu ba Sra. Maria Joana Dulce, hodi ba halo tratamentu iha rai liur, maibe Sra. Maria Do Ceu (Vice Ministra MS), hatuun fali ba HNGV, katak nia bele halo tratamentu iha rai liur ka lae,” nia informa.

,