“Komunidade Likisa Lamenta Ho Prezensa CALUR”

.

Jornal Independente - Kuarta-feira, 07 Agusto 2013 

Organizasaun foun ida ne’ebe hanaran Clandestina Atan Libertasaun Uluk Rezistensia (CALUR) hala’o kobransa ba komunidade sira iha Suku Dato, Distritu Likisa. 

Eis xefe Aldeia Hekaer, Sub Distritu Likisa Vila, Silvester de carvalho informa, organizasuan ne’e hala’o kobransa ba komunidade iha Aldeia Hekaer no Lisaiko. Aleinde husu osan, Silvestre hatutan, organizasaun ne’e mos promete atu fo kamiaun (Truk) ida ba kada ema ne’ebe hakarak oferese rai ba CALUR hodi harii sira nia edifisiu. 

“Organizasaun ida ne’e foin dadauk mai ne’e husu ami atu halo fo sumbangan, ne’e labele, osan iha mak harii organizasaun, laos halo terus tan povu,” kestiaona eis Xefe Aldeia ne’e iha Likisa, Sabadu (3/8). 

Silvestre husu ba Polisia Distritu Likisa, inklui Autoridade Distritu atu investiga organizasaun ne’e. Iha fatin hanesan, Xefe Aldeia Lisaiko, Mateus dos santos preokupa ho ejistensia organizasaun ne’ebe husu fali rai ba povu atu hari sira nia edifisiu. 

“Ami lakohi fo osan, tanba sira dehan kada ema ida fo osan, maibe la’os ho obrigasaun, se iha bele fo, se laiha mos laiha problema, importante mak komunidade tenki simu organizasaun ne’e,” lembra nia. 

Ba kestaun ne’e, koordenador CALUR distritu Likisa, Alarico Henrique, esplika katak, CALUR hanesan organizasaun Naun-Govermental (ONG) ida. 

Tuir nia, organizasaun ne’e moris tanba istoria pasadu ne’ebe mak Francisco Xavier do Amaral, inklui Saudozu Nicolao Lobato rai hela. “Ami hanesan banati de’it, tempu ida ami sei konvida ita boot sira (jornalista) hodi esplika klaru ba ita boot, ne’ebe di’ak liu mai ita hamutuk hodi harii NGO ne’e moris ba oin,” dehan nia. 

Tuir observasaun Jornalista jornal ne’e, ONG CALUR hahu halo sosializasaun ba komunidade sira hodi bele rekonese sira nia ezistensia.

.