“Jerasaun Foun Labele Trai Luta FALINTIL”

.

Jornal Independente - Kuarta-feira, 21 Agusto 2013 

Istoria naruk ne’ebe jerasaun tuan sira halo hodi liberta nasaun Timor Leste (TL) husi okupasaun invazor sira, joven tenki kaer metin nafatin ispirito FALINTIL nian, tanba ne’e, jerasuan foun sira labele trai espiritu luta ne’ebe FALINTIL husik hodi kontinua dezenvolve nasuan ne’e atu povu bele moris iha pas no proesperidade nia laran. 

Estadu Timor leste ofisialmente dezemobiliza FALINTIL hamutuk 221 liu husi serimonia parada military, iha selebrasaun loron FALINTIL bad ala 38, tersa (20/8) iha betano Sub Distritu same, Distritu manufahi. 

 Tuir Observasaun Jornal INDEPENDENTE iha Betano nota katak, bainhira komisaun organizadora loke filmazen kona ba istoria ba prosesu funu ba libertasaun nasional husi tinan 1975 to’o 1999 halo lideransa nasaun nian inklui povu tomak ne’ebe partisipa iha serimonia dezmobilizasaun ne’e tanis. 

Filmazen ne’ebe fo sai liu husi transmisaun direta TVTL hanoin hikas saida mak akontese iha pasadu liu husi funu nain sira nia kontribuisaun, tanba balun mate no balun konsege sei moris hela. Lideransa ne’ebe mak tanis hanesan, Prezidenti Republika Taur Matan Ruak, Prezidenti Tribunal Rekursu Claudio Ximenes, Prezidenti parlamentu nasional Vicente Guterres, Xefe Estadu maior F-FDTL Lere Anan Timur. 

Nune’e Prezidenti Republika Taur Matan Ruak husu ba joventude rejistensia atu organiza a’an didiak hodi partisipa iha dezenvolvimentu nasional. PR mos husu ba Joventude sira tenke hahu prepara an hodi simu responsablidade boot hodi mantein displina, espiritu patriotizmu, no presiza respeita ba irarkia, atu nune’e joventude sira hatudu ba povu tomak nia oin. 

“Ukun an ita hetan ona, maibe moris diak ita seidauk hetan, laiha sentidu ba ukun rasik an,” PR taur dezafia joventude hafoin dezmobilizasaun FALINTIL sira. Bainhira funu 1999 la kotu, PR Taur espera joventude ne’ebe envolve iha frente klandestina mak sei kontinua funu hodi hetan Independensia liu husi sofrementu joventude sira hatudu ona durante luta ba ukun rasik an. 

Tanba ne’e, Taur husu ba Governu liu husi Sekretariu estadu asuntu Veteranus atu tau matan ba joventude rezistensia sira ne’ebe involve iha prosesu libertasaun nasional. 

“Lalika husu ba sira funu tinan hira, husu deit ba sira katak, sira iha momentu ne’eba iha hotu ka lae, Juventude barak mak husik sira nia eskola, tan ne’e ita nia nasaun sira nia kontribuisaun ba prosesu luta,” hateten PR Taur Matan ruak. 

Xefe Estadu ne’e hirus Governu, tanba to’o oras ne’e la tau importansia ba juventude rejistensia iha tinan 1999.

,