“PJR Aprezenta Kazu Money Laundry ba PR Taur”

.

Jornal Independente - Tersa-feira, 06 Agusto 2013 

Prokurador Jeral Reupublika (PJR), Jose da Costa Ximenes informa kazu krime brankeamentu kapital (money laundry), ne’ebe hetan ona sentensa iha Tribunal foin lalais ne’e ba Prezidenti Republika, Taur Matan Ruak. 

Nia dehan, Tribunal Distritu Dili (TDD) hasai ona penalidade funsionariu ne’ebe envolve nia maun no feen hodi halo krime brankamentu kapital iha instituisaun estadu nian. PJR apresia tebes ho servisu majistradu sira nian, tanba bele deteta krime ne’ebe foin primeira ves akontese iha Timor-Leste, tanba, limitasaun barak tebes, maibe konsege esforsu aan hodi hala’o sira nia kna’ar ho diak. 

Nia dehan, iha oportunidade ne’e nia informa mos numeru krime ne’ebe mak iha ba Prezidente hanesan iha 30 Abril iha kazu pendenti purvolta 5.100 no agora dadaun to’o 31 Jullu tuir dadus hela 4.500, ne’e prosesa ona kazu 600. 

Nia informa mos kazu omesidu ne’ebe mak akontese iha Ai-tarak laran, Dili, arguidu primeiru hetan prizaun tinan 19, kazu Beach Garden arguidu nain 2 hetan kondenasaun akdeia tinan 26 no ida seluk tan hetan tinan 24. 

 Kona-ba kazu sira seluk hanesan akontesementu iha samalete, Atabae ho krime omisidiu seluk tan agora daudaun prosesu tama hotu ona hodi kombate krime sira ne’ebe mak grave. 

Nune’e, PJR mos husu ba ema hotu para labele halo krime, se lae pena hanesan ne’e barak depois prejudika familia no sira nia tempu. Maski nune’e, Prezidenti da Republika Taur Matan Ruak husu nafatin ba Ministeriu Publiku (MP), liu husi PJR hodi kontinua esforsu. 

 Nia dehan, prezidenti Republika mos, husu ba Ministeriu Publiku para kontinua esforsu maka’as hodi halao nafatin sira nia servisu no garante kualidade servisu ba sidadaun sira ne’ebe mak buka justisa. 

Iha oportunidade ne’e, PJR informa mos kazu droga ne’ebe mak hetan ona julgamentu no aplika ona pena prizaun ba arguidu sira, krime droga 3 mak tama ona ih aprokurador Distrital Dili, hotu-hotu akuzadu ona no balun hein deti julgamentu.

.