“Pecat Ministru Saude"

.

Jornal Independente - Kuarta-feira, 07 Agusto 2013 

Publiku hahu duvida ba prestasaun servisu Ministru saude Sergio Lobo, tanba hamosu indikasaun barak durante tinan ida nia ukun Ministeriu saude, tinan ida nia laran, publiku sempre kestiaona falta ai-moruk, falta ambulansia, pasiente rasik ense mina ba ambulansia, indika mosu nepotismu trasferensia pasiente halo tratamentu ba rai liur, indika mosu nepotismu ba prosesu fornesementu ai-moruk no seluk tan. 

Karik ho dadus hirak ne’e, Primeiru Ministru Kay Rala Xanana Gusmao bele troka Ministru saude Sergio Lobo tuir ezijensia sosieade sivil sira? Karik PM Xanana hamaus Ministru ne’e atu kontinua servisu to’o mandatu Governu koligasaun remata?

Diretor Interinu, organizasaun Naun Govermental Luta Hamutuk, Joaozito Viana ezjiji PM Xanana atu troka Ministru saude, tanba nia laiha kapasidade atu halo manutensaun ba ambulansia no laiha planu ne’ebe diak hodi kontrola sasan Estadu nia liliu ba ambulansia ne’ebe durante ne’e kondisaun grave iha Distritu. 

“Ida ne’e hatudu katak, nia Sr, Sergio Lobo, inkapasidade, tanba ne’e ami eziji Primeiru Ministru (PM) Xanana Gusmao atu pecat (troka), Ministru saude (MS), Sr. Sergio Lobo, tanba laiha planu diak hodi halo manutensaun ba ambulansia hodi fo atendementu diak ba pasiente sira liliu iha Distritu, Sub-Distritu, Suco no Aldeia sira,” hateten Director Interinu, Luta Hamutuk, Joaozito Viana ba INDEPENDENTE, iha nia knaar fatin,” horseik. 

 Tuir Joaozito PM tenke husu ona Ministru saude atu rezigna-an, nia dehan, durante ne’e Ministru Saude la senti buat ne’ebe mak pasiente sira infrenta iha area rurais. 

“Nia Sr. Sergio Lobo rasik durante ne’e nunka sente hanesan buat ne’ebe durante ne’e pasiente moras sira senti iha area rurais dala ruma laiha atendementu mediku sira ne’ebe mak fo atendementu ba sira,” tenik Joaozito. 

Nia dehan, Ministru saude laiha planu ida neebe diak hodi kontrola sasan publiku, tuir loloos Ministeriu Saude mak tenke harii sistema hodi regula. Kestaun ne’e, antes ne’e mos liu husi Diretor Diresaun Nasional Apoiu Servisu Hospital no Engkaminhamentu rekonese katak, durante ne’e ambulansia iha Distritu haat Manufahi, Viqueque, Ermera no Oe-Cusse iha fulan ne’e seidauk bele halo operasaun iha Distritu refere, tanba sei troka klep fuan (mesin) iha Bengkel.

.