“Governante Balun Tenta ‘Boikota’ PM Xanana”

,

Jornal Nacional Diario - Tersa-feira, 06 Agusto 2013 

Iha Kinta (8/8/2013), Governu Aliansa Bloku Koligasaun (ABK) ne’ebe mak lidera husi Primeiru Ministru (PM) Kay Rala Xanana Gusmao, kompleta tinan ida Governasaun, Ironi tebes, iha tinan ida V Governu Konstitusional ne’e seidauk hatudu progresu servisu no PM Xanana rasik rekonhese nia governante sei servisu sabraut hela. 

 PM Xanana rekonhese governante iha ABK ne’e sei servisu sabraut, dala ruma tanba ezekusaun orsamentu estadu tinan fiskal 2013 iha Ministeriu ida-idak sei minimu liu foin mak 25%-30%, maibe observasaun husi Rui Castro nia katak, Ejekusaun OGE tinan fiskal 2013 ne’e foin mak atinji 30% tanba iha intensaun politika husi membru Governu balun ne’ebe mak tenta atu ‘boikota’ susesu lideransa PM Xanana nia. 

Prezidenti Director Ruvic Group, Rui Castro deskunfia katak, dala ruma ema balun hakarak ho intensaun duni trava ejekusaun orsamentu 2013 nian atu nune’e bele hamonu reputasaun no lideransa PM Xanana nian nu’udar Xefe do Governu. 

 “Hau haree katak iha indikasaun politika ne’ebe la dun diak iha ejekusaun Orsamentu Geral Estadu tinan fiskal 2012-2013 nian, tanba foin atinji 30%,” afirma Rui Castro hodi responde Jornalista iha nia kna’ar fatin, Bidau Lecidere, Dili, Segunda (5/8). 

Rui Castro foti kestaun katak, iha Governasaun Aliansa Maioria Parlamentar (AMP) ne’ebe FRETILIN hala’o nia kna’ar popozisaun halo duni hodi kontrola ativamente ba Governu nia servisu, pelumenus ejekusaun orsamentu la’o dia oituan, maibe bainhira iha 2012 hahu forma Governu Aliansa Bloku Koligasaun (ABK), orsamentu sulin hanesan bee, maibe iha inisiu Janeiru-Fevereiru 2013 no mai to’o agora, FRETILIN hola pozisaun politika seluk ida, hodi sai nafatin opozisaun maibe apoiu PM Xanana hodi kontribui votus aprova unanimamente OGE 2013 nian, maibe ezekusaun la dun diak, foin 30%. 

Nia dehan, membru Governu balun foti rajaun katak, ejekusaun OGE 2013 foin mak atinji 30% tanba implikasaun direta husi mudansa sistema Governu nian, Rui Castro Konsidera, argumentu ne’e la fundamentu, tanba tuir nia haree, iha duni grupu membru governu balun ne’ebe mak hamutuk ho PM Xanana mak la dun kontenti no aseita ho konjuntura Politika foun ne’ebe FRETILIN fo apoiu ba PM Xanana iha Parlamentu Nasional. Rui Castro dehan, ema sira ne’ebe halo boikota ba PM Xanana hanoin katak, FRETILIN hamutuk fali ho PM Xanana ne’e atu hadau sira nia fatin ukun, tanba ne’e mak sira halo manobra tun sae hodi ejekuta OGE 2013 ulun-ain atu bele estraga kredibilidade no ukun ne’ebe lidera husi lider Karismatiku Kay Rala Xanana Gusmao. 

“Hau atu dehan deit katak, membru governu balun la dun iha onestidade atu servisu hamutuk ho PM Xanana hodi tenta hela halo ‘boikota’ ba programa PM Xanana nian, tanba ne’e ejekuta OGE 2013 tarde tebes no konsege at liu iha Governu FRETILIN ho Governu AMP nia tempu,” Rui Castro argumenta. 

Nia hatutan, Prezidenti Republika (PR) Taur Matan Ruak ho PM Xanana konsidera katak, kinerja membru Governu sira nian iha tinan ida ne’e la dun diak, tanba estrutura governu nian boot no bokur demais hodi halo membru sira servisu la hatene. 

“Ita ema kuandu bokur liu halo ita han barak, maibe baruk ten, tanba ne’e mak presiza deit oituan atu halo kiik oituan ita nia isin hodi bele book an no hodi servisu diak,” hateten Rui Castro. 

Nia mos konsidera, konjuntura politika foun neebe FRETILIN ho PM Xanana halo ne’e pozitivu tebes hodi hatudu ba jerasaun foun sira katak, sira jerasaun tuan 1975 nian hamutuk fali ona hodi halo diak ba povu ida ne’e no prepara hela lembransa diak nalun antes entrega aitongka estafeta ba jerasaun foun. Tuir Rui Castro, Jerasaun antigu 1975 sira tenke hatudu no rai hela buat diak ba jerasaun foun, tanba ne’e mak sira hakarak hatudu edukasaun politika fiar malu no hamutuk mak bele lao ba oin, tanba ne’e mak jerasaun foun sira hotu tenke haree konjuntura politika ida ne’e husi parte pozitivu. Antes ne’e, Sekretariu Jeral Partidu ne’ebe halo istoria FRETILIN, Dr. Mari Alkatiri hateten bei-beik ona katak, FRETILIN hamutuk fali ho PM Xanana Gusmao la signifika tenke tama Governu no FRETILIN rasik laiha lista no la iha interese atu tama Governu, maibe FRETILIN hakarak fo apoiu 100% ba dezenvolvimentu Nasional. 

“Dala ida tan hau hateten katak, iha ema balun la kontenti bainhira FRETILIN ho Xanana la’o hamutuk,” afirma Rui Castro. 

 Kona ba issu remodelasaun, Rui Castro dehan,”Dala ida tan, hau dehan governu ne’e bkur demais, tanba ne’e kuandu bokur demais toba hela deit, sei la halo serviso ho efisiensia no efikasia,” esplika Rui Castro. 

Rui mos rekonese katak, iha faktu hatudu duni Governu ho nia membru ema nain 55 ne’e boot tebes no nasaun ida kiik hanesan Timor-Leste, aat liu tan, membru Governu balun la hatene halo serviso no hein deit instrusaun husi PM Xanana Gusmao. 

 Balun fali, Rui Castro dehan, servisu 1x24 jam sai hela deit iha media hodi promove sira nia an ba publiku, maibe balun fali la hatene halo saida mas tinan ida ona nunka sai iha media, tanba ne’e presiza halo reflesaun nasional ida ba membru governu hotu atu bele hadia servisu governu nian.

.