Projeitu Bairos Polisia Aileu, “Deskonfia CAN Halo Manobra”

.

Jornal Nacional Diario - Segunda-feira, 19 Agusto 2013

Projeitu Bairo Polisia Distritu Aileu (ITB No.NCB/011/MDS-2013), deskonfia iha manobra no indikasaun nepotismu ne’ebe halo husi Comissao Nacional Aprovizionamentu (CNA).

Tuir Record or Price opening ne’ebe halo iha loron 05 Julhu 2013, tuku 15:00 OTL no asina diretamente husi Aniceto do Rosario, nudar membru CNA, Rolito Rillo (membru CNA) no Greesh Sharma nudar projeckt director CKP, hatudu katak, kompanhia rua (2) mak kualifikadu, kompostu husi kompanha Luz Clarita Unipessoal Lda ho Arvec Construction Unipessoal Lda.

Iha dokumentus record of Price Opening ne’e, Luz Clarita Unipessoal Lda ho nia technical score 423 no bid price US$ 1,434,728.90, no Arvec Construction Unipessoal Lda nia tecnichal score 377 ho bid price U$ 1,124,740.51. Ironi liu, iha fali anunsia husi CNA ne’ebe asina diretamente husi Aniceto do Rosario, nuudar membru CNA aumenta tan montante osan ho valor U$1,146,037,02 ba Arvec Construction Unipessoal Lda, ne’ebe konsidera legalmente sai vensidor ba projeitu ne’e.

Ho valor orsamentu US$ 1,146,037.02 ne’ebe sai contrackt price husi Arvec Construction Unipessoal Lda, signifika aumenta tan osan mais ou menus US$ 21,000,00 ba Arvec Construction Unipessoal Lda, husi nia bid Price inisila US$1,124,749.51. Kompnaha Luz Klarita Unipesoal Lda, senti konfundi boot ho anunsiu CNA nian ne’ebe publika iha media komunikasaun social iha edifisiu Sesta-Sabadu (16/17/8/2013), tanba derepenti deit Arvec Construction Unipesoal Lda, bele hetan kontrack Price nakfilak sae husi US$ 1,124,740.51 ba US$ 1,146,037.02.

“Kompania ne’ebe deit mak manan projeitu ne’e la sai problema ba ami, hau mos laos rekere atu manan projeitu ne’e, mais importante mak CNA tenke foti desizaun ne’ebe justu, honestu no transparansia,” afirma Direktor kompania Luz Clarita Unipessoal Lda, Aleixo da Silva gama “Cobra” ba Jornalista sira iha servisu fatin, Sabadu (17/8).

 Aleixo Cobra dehan, nia parte hakfodak deit, tanba tender ne’e wainhira loke technical proposal hatudu momos katak, kompanha Luz Clarita nia valor as (432) kompara ho Arvec Construction Unipessoal Lda ho deit valor 377, nune’e, iha prosesu loke proposal finansial, Luz Clarita nian US$1,434,728.90 no Arvec Construction US$ 1,124,740.51. maibe, wainhira CAN anunsia fali iha media komunikasaun social halo konfuzaun tebes, tanba valor financial Arvec Construction nian ne’ebe manan projeitu ne’e sai fali U$ 1,146,037.02.

Tuir lei aprovizionamentu nian fo dalan no oportunidade ba kompania sira ne’ebe la kontenti ho desizaun tenderizasaun ne’e bele hatama keixa iha loron lima (5) nia laran, hahu husi loron ne’ebe CNA anunsia rezultadu tender, ba ida ne’e, Aleixo Cobra dehan, nia parte sei halo duni protestu ba CNA, maibe, nia mos deskonfia boot hasoru CNA publika sai iha fali loron sesta, atu dehan deit katak, nusa mak la fo sai kedas iha loron segunda, tersa ou kuarta.

 “Hau hare CNA iha duni intensaun at, tanba ne’e mak sira fo sai anunsia iha sesta para limita tempo baa mi halo protesta, basa, CNA hatene katak, iha sesta ba sabadu, loron ne’ebe ema ladun iha intensaun lee jornal, iha domingu ema konsentra ba familia no Igreija, iha segunda agora ema hotu konsentra ba inagurasaun sentral Eletrika Betano no iha Tersa (20/8), loron ferias tamba komemora loron aniversariu FALINTIL,” esplika Aleixo Cobra.

Nia deskonfia katak, CNA konsiente halo manipulasaun, nune’e talves bele hetan benefisiu ou hetan “Subornu” ruma husi kompania Arvec Construction Lda, Basa, tuir lei aprovizionamentu nian, proevidu tebes atu aumenta Virgula ka numeru ruma iha proposal finansial nian.

Ho deskontentimentu ba desizaun CNA nian ne’e, Aleixo Cobra, sei halo protestu ba Sekretariu Estadu Seguransa (SES) nudar nain ba projeitu Bairos Polisia Distritu Aileu, sei halo protestu mos ba Primeiru Ministru (PM) Xanana Gusmao, nudar mos Ministru Defeza no Seguransa (MDS), no sei hatama dokumentus ba Komisaun Anti Korupsaun (KAK) atu bele halo investigasaun profunda ba CNA.

“Hau sei buka tempu hasoru PM Xanana Gusmao atu husu klarifikasaun katak, PM Xanana Gusmao duni mak haruka aumenta osan ba kompania ne’ebe manan tender ho valor menus, se PM Xanana mak autoriza ida ne’e, mak PM Xanana viola ona lei aprovizionamentu,” afirma Aleixo Cobra.

Se PM Xanana la hatene kona ba buat ida ne’e, mak Aleixo Cobra sai husi PM Xanana atu hasai direitamente Aniceto do Rosario, Rolito Rillo ho Greesh Sharma, husi CNA tanba halo mafia boot iha CNA nia laran.

“Hau husu PM Xanana atu bele foti medidas hodi kansela kedas projeitu ne’e, tanba iha manobra noa indikasaun nepotizmu iha laran,” afirma Aleixo Cobra.

 To’o Noticia ne’e hatuun, seidauk iha konfirmasaun husi CAN ne’ebe foti desizaun ba tenderizasaun ne’e ho SES nuudar nain ba projeitu konstruksaun Bairos Polisia Distritu Aileu, tanba loron Sabadu Funsionariu Publiku la servisu.

.