“Alkatiri Dezafia Governu TL Manan Australia Ba Kazu CMATS”

,

Jornal Independente - Kinta-feira, 27 Junho 2013 

Eis Primeiru Ministru Dr. Mari Akatiri dezafia Governu Timor-Leste (TL) tenki manan Australia iha Tribunal arbitrazen Internasional kona ba kazu akordu Certain Maritime Agrement Timor Sea (CMATS) tanba lakon osan barak hodi selu advogadu Internasional. 

Governu anterior FRETILIN lidera huis Primeiru Ministru Dr. Mari Alkatiri no eis Ministru Estranjeiru no Kooperasaun Dr. Jose Ramos Horta mak asina akordu CMATS ne’e ho Governu Australia lidera husi Primeiru Ministru John Hower iha loron 23 fulan fevereiru 2006, no akordu ne’e foin remata iha 23 fulan fevereiru 2013. 

Entertantu, Sekretariu jeral FRETILIN, Mari Alkatiri hatete, iha nia tempu aru aluga advogadu Internasional osan laiha, iha momentu ne’eba, nia konfesa katak nia servisu de’it ho ema rua ka tolu, maibe konsege halo duni no iha duni rejultadu. 

Maibe agora Governu lakon osan barak hodi selu advogadu oioin bele buka defende diak liu interese TL nian. Nune’e, nia fo parabens ba governu nia esforsu, karik atu manan iha Tribunal arbitrazen. 

“Hau nia pozisaun mak ne’e, Governu manana hau fo parabens se lakon hau kritika,” hateten Alkatiri ba INDEPENDENTE iha nia rezidensia Palpasu (26/6). 

Maski nune’e, nia pronto ajuda defende direitu estadu Timor-Leste nian, karik hetan konsulta husi Governu. “Hau hein de’it se Governu konsulta ho hau, hau koalia ho sira se konsulta deit ho Internasional hau hein de’it, dehan Alkatiri. 

 Nia hatutan, durante ne’e nia la hatene esforsu governu nian kona ba akordu CMATS ne’e, maibe Primeiru Ministru xanana foin mak informa ba nia katak, kazu ne’e sei lori ba Tribunal arbitrazen Internasional. “Saida mak hau dehan iha ne’e ba imi (Jornalista) hau dehan mos ba nia (PM Xanana) kona bah au nia pozisaun,” dehan Alkatiri. 

Nia hatutan, pipeline atu mai Timor-leste ne’e povu hotu-hotu hamutuk atu luta tamba objetivu la diferenti, hanesan de’it, hotu-hotu hakarak direitu ne’e mai Timor-Leste. Nia dehan, se akordu CMATS ne’e mak mate, tenki hahu fali husi zero, se negosiasuan mak TL hetan pursentu 20 ka aas liu fali, diak liu tan. 

Antes ne’e, Ministru Petroliu no Rekursu Minarais Alfredo Pires hatete, kontiudu husi karta resposta husi Governu Australia seidauk bele anunsia, tanba hein hela Australia nia pozisaun atu hili ona advogadu no prezidenti meja ba arbitrazen internasional. 

Timor-Leste hili ona arbitrazen inglatera, no oras ne’e hein nasaun rua ne’e atu kunsulta malu hodi halo konkordansia ba arbitrazen internasional.

.