Defende Povu TL, “PM Xanana Infrenta Kazu 35”

.

Jornal Nacional Diario - Segunda-feira, 17 Junho 2013 

Primeiru Ministru (PM) Kay Rala xanana Gusmao informa katak, nia parte sei hata’an iha Tribunal relasaun ho kazu 35 neebe Estadu Timor Leste (TL) ne’e infrenta, tanba defende interese povu no rai ida doben Tl ida ne’e. 

“Hau atu ba hatan iha Tribunal ne’eba tanba kazu 35, atu defende imi, imi nia inan aman sira no imi nia oan sira aban bain rua, la’os atu defende hau nia an,” dehan PM Xanana Gusmao ba estudante Universidade Dili (UNDIL) sira foin lalais ne’e, relasiona ho informasaun balun ne’ebe espailla antes ne’e katak, sira sei halo asaun demonstrasaun hasoru governu hodi akuza governu fakar osan arbiru deit. 

Ho ida ne’e, Xefe Governu ne’e husu ba estudante Timoroan tomak atu buka hatene problema sira ne’ebe oras ne’e dadauk nia infrenta, labele hanoin demais atu kria problema. 

Maske xefe governu ne’e temi deit kazu 35 mak estadu TL enfrenta, maibe la esplika detaillus kona ba kazu ida por ida, maibe Xanana husu ba estudante sira no publiku tomak atu akompania politika ne’ebe lao iha mundu ne’e, atu nune’e bele kumpriende situasuan iha rai laran no iha mundu tomak. 

“Hau iha kazu 35 hasoru governu, maibe hau la interese tanba defende Timor nia interese, invez de hau preokupa ho kazu sira ne’e, hau mai preokupa fali ho imi,” dehan Xanana. 

Tuir Xanana, nuudar nasaun demokratiku, ema hotu iha lei nia okos, no demokratiku katak buat hotu povu mak hili, laiha ema ida atu hamrik iha lei nia leten. 

“Ida ne’e mak hau dehan ba imi, ba soberania rai ida ne’e, hau la sukat hau nia an ho ema seluk, maibe hau mak sala satu, imi bele fiar, matebian sira mos bele fiar, kuandu ho sama hau nia ulun, ne’e deskulpa ho sama ona povu ida ne’e,” dehan xanana Gusmao. 

Eis lider rejistensia ne’e esplika katak, agora dadaun ne’e Timor infrenta problema boot rua ho Ausralia, estadu tenki forte tanba problema rua ne’e ho osan ne’ebe barak ba dezenvolvimentu rai no povu ida ne’e nian. 

Xanana dehan tan, kuandu hakarak defende Timor nia soberania, Timoroan hotu tenki unidade, kuandu Timoroan la unidade ema seluk mos aproveita oportunidade hodi book iha parte seguransa nian. Problema boot liu mka, katak Xanana, Problema ho kompania boot ida ne’ebe mak na’ok Timor nia riku soin, maibe Timor oan barak mak lahanoin to’o iha ne’eba. 

 “Agora dadaun ne’e hau nia ulun moras, tanba preokupa ho kompania sira ne’ebe mak haree Timor nia riku soin sira ne’e, maibe haul abele fokus ba problema sira ne’e, mai preokupa fali ho imi,” dehan Xanana. 

.