“Prizioneira Lucia Hein Resposta KSMJ”

.

Jornal Timor Post - Sesta-feira, 21 Junho 2013 

Prizioneira Lucia LObato to’o oras ne’e hein hela desizaun husi Konsellu Superior Majistratura Judisial (KSMJ), kona-ba karta ne’ebe Lucia LObato hatama iha Tribunal kontra independensia servisu juis sira nian. Advogadu Jose Pedro Camoes informa ida ne’e ba diariu Timor Post Kinta (20/6) iha Dili. 

“Tuir informasaun ikus, hau nia kliente Lucia sofre hela moras iha prizaun Gleno, entaun ami la iha ona dalan seluk atu liu, nune’e mak ami kontinua hein, bainhira mak Tribunal Rekursu bele fo sai desizaun,” nia hateten. 

Kona-ba kondisaun Lucia Lobato iha prizaun Gleno, Jose informa, prizioneira ne’e ho kondisaun moras, maske nune’e, kontinua hatudu vontade diak atu hein desizaun husi Tribunal Rekursu. Entertantu, Prezidenti Tribunal Rekursu, Claudio Ximenes hateten, Timoroan labele foti desizaun ba Habeas Corpus ne’ebe advogadu Prizioneira Lucia Lobatu hatama ba Tribunal, tanba ne’e, to’o oras ne’e seidauk iha desizaun. 

“Laiha ema ida (Timoroan) atu halo ida ne’e (foti desizaun), sei iha tan inspetur ida para mai halo tan abriguasaun,” hateten Claudio ba Timor Post, hafoin partisipa enkontru Dezenvolvimentu Timor Leste, Kuarta (19/6) iha CCD. 

Claudio husu tiha ona tulun ba nasaun CPLP, atu hetan inspetur ida hodi halo analiza no foti desizaun, maibe to’o agora nasaun hirak ne’e seidauk fo resposta,” sei hein atu to’o tempu hodi foti desizaun,” nia dehan. 

Hatan ba jornalista, tuir lei, resposta (desizaun) husi Konsellu superior Judisial Majistratura (KSJM) durante loron Ualu (8), Caludio hateten, maske lei hateten nune’e, maibe depende ba situasuan, desizaun bele hetan iha loron 8 ou bele loron 30. 

“Lei dehan nune’e maibe iha realidade ne’e dala ruma ita tenki husu ba liur, ital abele fo prazu, buat sira ne’e ita tenki haree didiak,” hatutan Caludio. 

Iha oportunidade ne’e mos, Claudio hateten, nia lakohi koalia ona kona ba kazu entre nia ho deputadu Aniceto Guterres husi Bancada FRETILIN, relasiona ho kazu Lucia nian, ne’ebe, Aniceto publika lista kontaktu telemovel entre nia ho Lucia. 

Entertantu, Eis Ministra Justica, Lucia LObatu hetan kastigu tinan lima fulan 6 iha prizaun Gleno, ermera, tanba kazu korupsaun (fo Projeitu ba nia laen kaben) ne’ebe akontese iha nia mandatu iha Kuartu Governu Konstitusional. Hafoin desizaun final, Tribunal Distritu Dili (TDD), Advogadu Lucia, kontra desizaun ne’e tanba konsidera illegal, ikus mai laiha mudansa desizaun husi Tribunal Rekursu, no ikus mai advogadu kontinua hato’o Habeas Corpus (Peninjauan Kembali) ba tribunal rekursu (Konselu superior mazestratura), maibe to’o agora seidauk iha desizaun. 

,