“HAK: Polisia Defende An Laiha Baze Legal”

.

Jornal Independente - Sesta-Feira, 14 Junho 2013 

Diretur Interinu Asosiasaun HAK Manuel Monteiro Fernandes konsidera komandante PNTL Distritu Dili, Superitendente Pedro Belo defende aan laiha baZe fundamental (Laiha baze legal), tanba membru ne’ebe halo agresaun fizika hasoru ema sivil ne’e violasaun direitus humanus. 

Nia dehan, Polisia hanesan instituisaun estadu nian ne’ebe iha aparedu kompletu, sira iha kbiit no knaar boot atu asegura lei no orden. 

 “Polisia halo agresaun fizika maka’as ba ema sivil ne’e konsidera hanesan violasaun direitus humanus satan ba orgaun soberania Timor Leste nian,” dehan Monteiro ba Jornal Independente iha kna’ar fatin, Farol, Dili (13/6). 

Nia mos intrepreta lei katak, iha artigu 243 ne’e hatete, obstrusaun ba autoridade publiku signifika aplika iha situasaun ne’ebe greve no nakonu ho violensia, lei ne’e fo dalan ba autor seguransa sira iha kbiit atu halo atuasaun ba kazu ruma hodi garante sidadaun nia direitu ba seguransa, maibe dehan nia, kuandu situasaun la grave, autor seguransa labele uza forsa. 

“Ami mos halo investigasaun, kazu ne’e krimi bai-bain ne’ebe funsionariu iha loja 88 halo problema ba malu depoius istori malu, bolu polisia atu atua tanba suspeitu ne’e tuda loja,” nia informa. 

Tuir nia katak, lolos Polisia Raks Force nia prezensa atu hakalma situasaun deit laos atu halo problema no hasai ninia atetude ne’ebe halai ba krime. Antes ne’e, Xefe Estado Maior das FALINTIL-Forsa Defesa Timor Leste (F-FDTL), Maijor Jeneral lere Anan Timor mos preokupa deklarasaun komandante Polisia Distritu Dili, Superitendente Xefi Pedro Belo hasoru Parlamentu Nasional. 

Tuir Lere, lolos polisia labele kontra fali politiku, maibe simu kritika ne’e hodi kurizi an no hadia ba interese seguransa nasional nian. Oras ne’e, eskipa Sekretariu estadu Seguransa (SES) halao ona investigasaun ba kazu ne’e. 

.