“David Dias: Ukun Nain Sira Labele Tau Kanoru Tohar Iha Parte Justica”

.

Jornal Timor Post - Tersa-feira, 18 Junho 2013 

Membru Deputadu iha Parlamentu Nasional (PN) kestiaona maka’as deklarasaun Primeiru Ministru (PM) Kay Rala Xanana Gusmao dehan Justica lae ona, relasiona ho Ministeriu Publiku fo ameasa ba arguidu ho pena 12-25 prizaun. 

“Ita nia nai ulun sira halo kritika justica, ita fo an liu ba policia, se hanesan ne’e, ita nia justica sei fraku, futuru nasaun ne’e atu ba ne’ebe?,” Deputadu david Diaz Ximenes iha plenaria PN, Segunda (17/6). 

 Tuir loloos, tuir David, Xefe Governu kurizi Polisia atu halo atuasaun loloos, justica mos ho loloos, tanba, tuir lei organiku, bainhira polisia uza kilat halo atuasaun ba kazu ruma, ne’e krimi. 

 “Justica ne’e justica, tenke halo separasaun poderes, labele kahur hamutuk, se lae ita sai arbiru aat liu tan,” nia kestiaona. 

Nune’e mos, deputadu Duarte Nunes, husi Bancada CNRT hateten, xefi governu halo deklarasaun kona ba Hera ne’e, tanba ita nia lei fo dalan ba sidadaun hotu iha direitu atu hato’o deklarasaun. 

“Hau hanoin Politika (ema) hotu-hotu iha direitu atu koalia, maibe desizaun ba kazu ne’e, iha juis sira nia liman,” deputadu ne’e informa ba Timor Post hafoin plenaria PN. Se iha faktus kona ba kazu ne’e, desizaun ba suspeitu ne’e bele hetan kastigu iha prizaun to’o tinan 12 to’o 25, kompetensia Tribunal, tuir lei. 

“Juis sira iha Tribunal maka labele rona politiku sira nia komentariu, juis ne’e tenki foti desizaun ida, tuir konsensia ho lei, se Tribunal mos hakarak rona deklarasaun sira ne’e, sala ona,” nia sujere. 

“Tanba ne’e hau mos dehan ba prezidenti Republika katak Problema Hera ninian, se husi justica la konsidera fatores hotu-hotu ne’ebe involve ba kazu ida neeba!

 Entaun justisa sala hotu ona, ne’e hau mak dehan,” PM Xanana hateten ba Jornalista sira (13/6) iha Palasio Prezidenti Nicolau Lobatu Bairo-Pite hafoin hasoru malu ho Prezidenti Republika, Taur Matan Ruak. Xefi Governu hato’o kestaun ne’e, tanba tuir nia wainhira sei joven asisten advogadu sira halao julgamentu iha Tribunal, iha malae ida kaben ho Timor, iha tempu Portuguesa, 

Xefe Governu momentu ne’eba gosta tebes tanba autor justisa ne’e defende, maski xefe governu dehan buat ruma la los maibe autor justisa ne’e defende ho kapa’as tebes. 

“Ne’e justisa ne’e laos hare deit ba lei-lei be naran sa ona, maibe tenki hare mos ba fatores htu-hotu, kondisionalismu hotu-hotu ne’ebe halo buat ida ne’e mosu, ne’ebe ita la fiar justisa, Polisia mos la fiar justisa, kuandu polisia la fiar justisa, ema bele sunu uma mos dehan lae, kaer no baku ema mak dehan fali viola fali direitus umanus, depois tama fali kadeia, diak liu husik tesik ba ne’eba,” PM Xanana dehan. 

.