“Osan Minarai Sulin Ba Rai Liur”

,

Jornal Timor Post - Kinta-feira, 20 Junho 2013 

Reprejetante povu iha Parlamentu Nasional (PN) kestiaona sidadun estranjeirus hanesan Xineza ne’ebe kaben ho feto Timor laiha osan, maibe haruka osan sai hotu ba rai liur. 

 “Sira ne’e fa’an sasan iha ita nia rain, hetan osan lori ba nia rain, ne’e ita haree xina sira mai ne’e laos atu investe osan iha ita nia nasaun mais mai para atu supa ita nia osan minarai nian ba para hotu iha rai liur,” deputadu Paulino Monteiro husi Bankada Partidu Demokratiku (PD) iha PN, Kuarta (19/6). 

Nia hatutan, lei investimentu ne’e sei fraku, tanba estranjeirus ho viza Turista balun mai ho kapital kiik deit mos mai halo negosiu. 

Tan ne’e, Governu Timor Leste presiza regula ema estranjeirus sira tenki ho lei ida forte, atu nune’e bele fo vantazen ba negosiante Timoroan sira rasik bele dezenvolve sira nia ekonomia iha rai laran. 

Deputadu ne’e mos preokupa, tan sa ih alina fronteira Timor-Leste ho Indonezia, tanba oras ne’e ema husi Indonezia mai Timor lori sasan tama illegal (jalan tikus), entaun Timor la hetan tasa negosia iha area fronteira. 

Iha sorin seluk, Deputadu Inacio Moreira, husi bancada FRETILIN dehan, lei Timor atu fob a ema estranjeirus atu sai sidadaun Timor no mos ema sidadaun sira ne’e uluk luta ba rezistensia hanesan Max Stall no mos parde ho madre sira ne’ebe uluk kedas hela iha Timor. 

Tuir nia, lei sidadania ne’ebe oras ne’e vigora sei fraku tamba fo oportunidade ba ema estranjeirus sira tama mai Timor, ne’e impaktu boot tebes, wainhira ema husi rasi seluk tama mai barak ona mak Timoroan rasik sei lakon ninia kultura original. 

.