“Estudante Barak Pratika Prostituisaun”

.

Jornal Nacional Diario - Sesta-feira, 28 Junho 2013 

Sekretariu Estadu Promosaun Igualidade (SEPI) Idelta Maria Rodrigues sente triste tebe-tebes wainhira haree diretamente fatin prostituisaun iha kapital Dili nebe estudante barak mak involve iha pratika Prostituisaun. 

“Hau rasik ba vizita dala ruma hau sai ho kareta espesial ba iha fatin prostituisaun sira iha Dili laran, maibe hau haree estudante sira mak barak liu, ita sempre triste maibe sira ho razaun tamba factor ekonomia ne’ebe sira sempre halo duni tamba osan laiha,” SEPI Idelta Maria Rodrigues hateten ho triste iha fatuhada, Dili, Kinta (27/6). 

Maske nune’e, SEPI Idelta Rodrigues mos la esplika dadus konaba estudante nain hira mak pratika prostituisaun iha fatin prostituisaun sira iha kapital Dili ne’e. SEPI dehan katak, wainhira iha nasaun ida buat ida prostituisaun ne’e sempre iha maibe iha Timor Leste ne’e ho kondisaun ida ne’ebe la favoravel no seidauk bele halo buat sira ne’e, tamba husi parte saude seidauk iha kontrolu ba situasaun ida ne’e. 

Tan ne’e Parte SEPI sei servisu hamutuk ho lideransa komunitariu sira atu kontrolu iha Aldeia, Suku, Sub Distritu hodi hato’o informasaun hodi bele halo prevensaun tamba “kupu-kupu malam” ne’e sei lori moras ba afeita fali ema seluk nia saude. 

 Nia hatutan, Jovens sira agora la hanesan uluk ona, tanba feto barak mak tun mai husi foho atu mai eskola iha Dili, sira mos lakohi hela ho tiun ka familia maibe sira hakarak hela iha kos hodi nune’e bele moris livre. 

Tamba ne’e, nia dehan, atu prevene ba situasuan ida ne’e husu ba familia sira hotu-hotu atu eduka moral ba ona sira, alin sira hodi nune’e bele la’o los, tamba dala ruma iha mos influensia husi nia kolega sira. 

Nune’e mos Prezidenti Feto Grupu Feto Parlamentar Timor-Leste (GMPTL) deputada Josefa Pereira informa, problema kupu-kupu malam ne’e problema sensetivu liu, tamba prejudika direitu no saude ema seluk ninia tamba seidauk iha seguru saude ne’ebe aban bain rua sei prejudika harmonia unidade ema nia familia nian. 

“Fila ba ita hotu-hotu atu oinsa buka mentalidade atu hanoin tok maneira oinsa mak ita atu bele buka osan la liu prostituisaun ne’e ba ita nia a’an, maibe ba ninia efeitu negativu ne’e sei mai ikus,” hateten deputada Josefa Pereira. 

.