Ohin Tribunal Desidi Kazu Hera, “Arguidu Mariano Sei Ba Hela Iha Becora”

.

Jornal Timor Post - Tersa-feira, 25 Junho 2013 

Tribunal Distrital Dili, liu husi Juiz Koletivu ba kazu krime omesidu Hera, ohin sei foti desizaun primeiru instansia ba arguidu Mariano ho Agustinho neebe hanesan membru PNTL. 

Arguidu Mariano amiasa sei ba hela iha rizaun Becora, tanba liu husi alegasaun final Ministeriu Publiku (MP) husu ba Tribunal atu aplika pena tinan 25 kadeia, tanba faktus provadu katak, arguidu mak lori pistola tiru mate Matebian Armindo Soares. 

No Arguidu Agustinho hetan de’it ameasa ba pena suspensaun, tanba tuir faktus hatudu arguidu komete de’it krimi ofencas ba integridade fizika simples hasoru matebian, bainhira ba dada sai matebian husi uma laran sai mai liur. 

Entertantu, Ministeriu Publiku liu husi prokurador internasional Jose Luis Landim, liu husi alegasaun final ba kazu Hera, husu ba Tribunal Distrital Dili atu aplika pena entre 12 to’o 25 kadeia ba arguidu Mariano nudar membru PNTL tanba faktus prova komete krime omisidu agavadu hasoru matebian Armindo Soares. 

Landim haktuir, rajaun nia husu tinan 12 to’o 25 kadeia ba arguidu tanba faktus ne’ebe Ministeriu Publiku junta iha faktus hatudu provas katak, arguidu hanesan membru PNTL uja arma estadu nian hodi tiru mate vitima iha fatin atuasaun. 

Entertantu, parte defeza aprezenta husi defensor Fernando de carvalho husu ba Tribunal atu tetu didiak desizaun ba krime ofencas ne’ebe komete husi arguido Agustinho, tanba Polisia halo atuasaun tuir orden instituisaun. 

Tan ne’e, kona ba krime omesidu agravadu ne’ebe Ministeriu Publiku alega ba ninia kliente Mariano presiza investigasuan forensiku, no exame valisitiku atu bele identifika lolos involku ne’ebe hamate vitima Armindo Soares ne’e mai duni husi Mariano nia Pistola ka lae?

.