“TMR-SBY Sei Asina Akordu Lina Fronteira Oekusi”

.

Jornal Independente - Sesta-Feira, 14 Junho 2013 

Prezidenti Republika, Taur Matan Ruak (TMR), sei hala’o vizita ba Indonezia hodi asina akordu ho Prezidenti Republika Indonezia, Susilo bambang Yudhyono (SBY) kona-ba lina trestres Oekusse. 

Vise Ministru Negosiu Estranjeiru no kooperasaun (MNEK), Constancio Pinto hateten, Governu halo ona korrespondensia ho Indonesia hodi prepara planu ne’ebe sei halo iha vizita Prezidenti TMR, inklui lina Fronteira Oekusse. 

 “Sei iha asinatura akordu provizorio ida kona-ba segmentu ida iha Oekusse inklui pasabe ne’ebe sei rezolve,” tenik nia, iha palasiu prezidensial, Aitarak-Laran Dili (13/6). 

Constancio hatutan, Prinsipal husi vizita Xefe Esatdu nian, atu reforsa liu tan vizita Primeiru Ministru, Xanana Gusmao iha fulan kotuk kona ba kordenasaun atu akaba kestaun fronteira iha tinan 2013. Tuir nia, kestaun fronteira ohin loron rezolve ona kuaze porsentu 98% ba rai maran nian, tanba ne’e atu kontinua nafatin halo levantamentu dadus kona-ba Fronteira tasi nian. 

Ne’e duni, hafoin fronteira rai maran, ekipa sei kontinua hala’o levantamentu ba fronteira maritime ne’ebe mak sei koalia hamutuk ho Indonezia no Australia. 

“Prezidenti iha esperansa boot no kontente tebes ho servisu ne’ebe maka Ministeriu ne’e halo,” haktuir nia. 

.