PM Xanana La Fiar Superior PNTL, “Mandatu Longuinhos Prolonga Tan Ba Tinan 2”

.

Jornal Nacional Diario - Kinta-feira, 20 Junho 2013 

Primeiru Ministru nudar mos Ministru Defesa no Seguransa (MDS), Kay Rala Xanana Gusmao informa katak, ofisialmente mandatu Komandante Jeral (Komjer) Policia Nacional Timor Leste (PNTL), Komisariu Longuinhos Monteiro sei prolonga tan ba tinan rua, hahu husi tinan 2013-2014. 

 PM Xanana mos hateten, durante tinan rua periodu extraordinariu Komisariu Longuinhos MOnteiro nian, nu’udar MDS, husu ba ofisiais superior PNTL nian atu bele prepara an no hatudu kapasidade lideransa, nune’e iha tinan rua mai ne’e bele lidera hikas Instituisaun PNTL ne’e ho diak, ho dinamizmu, ho displina. 

“Tinan rua ne’e prova took mai, prova took mai kaer buat ne’e diak, kaer ho dinamizmu, ho kreatividade ituan, hodi disiplinha ituan ita haree took, hanesan ita dehan, katak tinan rua ne’e atu fo ofisiais superior sira oportunidade para sira hatudu took mai,” sadik PM Xanana. 

Veteranus funu ne’e hatutan iha tinan 2 ne’e nia laran ofisiais superior sira tenki aprezenta an nuudar kandidatu ne’ebe diak bainhira komandante actual muda. 

PM Xanana nuudar mos actual MDS hateten, iha lei dehan katak, sai komandante Jeral PNTL tenki mai husi kareira professional, maibe tanba ho esperensia ne’ebe nia iha mak presiza periodu extraordinaria nune’e bele prepara didiak ofisiais superior PNTL nian atu bele lidera PNTL ne’e iha tinan rua mai. 

“Ami hamutuk Konsellu superior Policia ninian ami hotu haree ona ba planu programas ne’ebe fora de instituisaun rasik iha Timor laran tanba ne’e mak sira hotu aseita, hau mos aseita katak, ami sei hanaruk, ami bolu periodu extraordinariu ba komando actual PNTL, ne’e duni komando actual ne’e sei kontinua tinan rua,” informa PM Xanana ba Jornalista sira iha Palacio Prezidensial, Aitarak Laran, Dili, Kuarta (19/10, hafoin hasoru malu ho Prezidenti Republika Taur Matan Ruak. 

Desizaun atu hanaruk mandatu Komisariu Longuinhos nian ba periodu extraordinaria ne’e liu husi reuniaun Konsellu Ministru extraordinaria ne’ebe maka hala’o foin lalais ne’e iha salaun Ministeriu Negosio Estranjeiru e Cooperasaun (MNEC) hodi deside katak, dekreitu lei ne’ebe fo mak pariodu extraordinaria ba Mandatu Komisariu Longuinhos nian ne’ebe mak monu iha dia 27 fulan ne’e katak, mandatu ne’e sei prolonga tan ba tinan rua. Hanaruk mandantu Komisariu Longuinhos Monteiro nian ne’e relasiona ho preparasaun Timor Leste (TL) nian atu assume Prezidencia Komunidade Paizes da Lingua Portugues (CPLP) iha tinan oin no parte seguransa nian mos komesa partisipa iha Organizasaun Association of South East Asia Nation (ASEAN) board nian. 

Nudar MDS, PM Xanana, Komisariu Longuinhos Monteiro lidera PNTL durante tinan lima ona, tanba ne’e ho kapasidade no esperensia ne’ebe iha presiza tenki aumenta tan tinan rua hafoin ofisiais superior PNTL nian prepara an. 

“Ita hanoin ituan nia iha ne’ebe tinan lima ona, fou-foun nia seidauk tama ne’e mak ita dehan, ne’e laos polisia de kareira mas Como nia mai ho back ground ida ne’ebe ita presiza iha tempu ne’eba, agora nia iha ona tinan lima laos kareira mas nia iha ona tinan lima de esperensia,” esplika PM Xanana. 

,