“Indonesia Gava Zona Ekonomia Espesial Oe-Cusse”

.

Jornal Timor Post - Segunda-feira, 24 Junho 2013 

Responsavel Zona Espesial Ekonomia Sosial Oe-Cusse, Dr. Mari Alkatiri informa, nasaun Indonezia gava tebes planu harii Zona Espesial Ekonomia-Sosial ba Distritu Oe-Cusse. 

Governu Indonesia rasik atu organiza enkontru ida iha Kupaun, kapital Provinsia Nusa Tenggara Timur (NTT) iha Timor-osidental, hodi deskute klean kona ba Zona Espesial ekonomia Oe-Cusse. 

Alkatiri hato’o kestaun ne’e, hafoin fila husi vizita durante semana rua iha Indonezia, durante tempu ne’e, Alkatiri Vizita Kupaun (Timor Osidental), Bali, Jakarta no Batam. 

 Objetivu vizita estadu ne’e, atu halibur hanoin no hetan esperensia husi Indonezia kona-ba estabelesementu Zona Espesial Ekonomia Merkadu no Sosial ho Projeitu Pilotu Oe-Cusse. Objetivu Vizita Estadu ne’e, atu halibur hanoin no hetan esperensia husi Indonezia kona ba estabelesementu Zona Espesial Ekonomia Merkadu no Sosial ho Projeitu Pilotu Oe-Cusse. 

 “Hau bele dehan, viazen ne’e diak tebes, tanba ita atu haboot nia importansia Projeitu Oecusse, atu sai projeitu ida iha reijaun no sub reijaun, bolu naran Indonezia oriental ho Timor-Leste,” Eis Primeiru Ministru no atual Sekretariu Jeral Partidu FRETILIN ne’e esplika ba jornalista sira, Dominru (23/6), bainhira halo konferensia imprensa iha Aeroportu Internasional Nicolau Lobato, Comoro, Dili. 

Tuir Alkatiri, Projeitu Oecusse sai baze investimentu ba rai Timor-Leste, nunee, bele hametin liu relasaun ekonomia ho Indonesia. 

 “Sira iha Indonesia rona buat sira ne’e, sira dehan uniku iha mundu, hau laos gava-an, maibe sira rasik mak dehan duni, tanba komponente social ne’ebe husi fundu rua, fundu investimentu no kombate pobreza,” Alkatiri dehan. 

“Servisu hamutuk ho Timor osidental, ita bele hetan bazaar boot liu, tanba populasaun Timor-Leste agora miliaun ida, tau hamutuk ho NTT no Maluku, bele to’o abitante miliaun 80, ne’e signifika merkadu ida boot,” Alkatiri esplika. Iha tinan 2003, Alkatiri hasoru Megawati Soekarno Putri (Eis Prezidenti Indonezia), fo hanoin Indonezia katak, lina Fronteira laos atu separa Timor-leste no Indonezia, maibe, lina Fronteira atu hakbesik ba malu no halo uniaun ida, liu husi Ekonomia. “ida ne’e diplomasia ekonomia Timor-Leste ne’ebe hahu buat ida konkretu, laos ho diskursu deit,” Alkatiri esplika. 

Kona-ba Projeitu tasi mane, Alkatiri dehan, presija ajuda malu, atu bele aintiji ligasaun ba Australia, Nova Zelandia no Pasifiku, nune’e, Timor-Leste sai sentru halo trinanglu ida ba Indonesia, Novazelandia no Australia. “Emprezariu no lider sira ho Indonesia, dehan programa ne’e furak tebes, sira hotu pronto atu kolabora no investe,” Alkatiri haktuir. 

Iha Batan, Indonesia, delegasaun Alkatiri observa dezenvolvimentu Batan, hanesan Zona espesial Ekonomia, haree kona ba asepeitu pozitivu no negativu husi Zona ne’e. 

Dezenvolvimentu iha Batam La’os lalais tebes, nune’e mos numeru Populasaun aumenta maka’as, tinan 40 liu-ba, populasaun iha Batam hamutuk rihun 10, ohin loron atinji ona kuaze miliaun 1 rihun atus rua, (1.200.000) jiwa Indonesia. 

“Maske nune’e ita lakohi kopea deit saida mak Indonezia implementa iha Batam, ne’ebe besik liu Singapura,” nia dehan Tan. Alkatiri mos kontenti rona informasaun husi Prezidenti Taur Matan Ruak, bainhira hasoru malu Denpasar, Bali, Indonezia,” Prezidenti Taur dehan, Governante Indonezia sira dehan Projeitu Oecusse nian “menarik sekali” (intersante loos),” Alkatiri haktuir. 

Iha tempu badak, Primeiru Ministru Xanana Gusmao, Prezidenti da Republika ho Responsavel Zona Espesial Ekonomia sei halibur malu hodi tau hanoin aselera prosesu ne’e. 

 “Ita tenki iha koordenasaun mega projeitu hanesan tasi mane ho Oe-cusse, hau hanesan patriota, hakarak dezenvolvimentu lao iha Timor-Leste tomak,” dehan Alkatiri. 

,