“PR Taur Hirus Protokolu”

.

Jornal Independente - Segunda-feira, 24 Junho 2013 

 Prezidenti Republika (PR) Taur Matan Ruak hirus ninia Staff protokolu sira tanba ladun fo atendementu diak ba konvidadus sira iha Palasiu Prezidenti. 

Xefe EStadu hirus staff protokolu sira relasiona ho aktividade alunus luron ibun nain 50 ne’e edukadores sira (18/6) ba hasoru Prezidenti Taur ne’ebe hanesan aman nasaun nian hodi fo agradese ba tempu durante ne’e hodi autoriza eskola infantile halao iha ninia edifisiu palasiu Prezidenti hodi halao prosesu aprendizazen. 

Maibe hafoin serimonia to’o rohan hasai foto hamutuk entre prezidenti Taur ho estudante no edukador sira, xefi estadu Konvida Xefe Eskola infantile Ana Gomes simu prezente de agradesementu liu husi tais Timor ba nia esforsu durante ne’e. 

Ho laran kontenti, Xefe Estadu bolu xefe Eskola ho nia alunus atu tama hikas ba salaun Xina Palasiu Prezidenti hodi intrega prezente maibe protokolu sira seidauk prepara buat ida. Xefe Estadu husu ba protokolu hodi lori tais Timor para fo prezenta ba Xefe eskola ho nia alunus sira maibe, protokolu sira hata’an ba prezidenti republika katak, tasi seidauk prepara. 

 “Imi prepara ona buat ruma lori mai, (tais-red), fob a Diretor ho nia alunus,” prezidenti husu ba Protokolu. 

Tamba la prepara saida mak atu fo, tamba ne’e, protokolu hatan deit dehan ‘iha leten hela’ entaun ho hirus Prezidenti Republika hateten ba protokolu sira,”Lori fila tiha imi nia tasi ba uma,” PR Taur ho oin buis hateten ba Protokolu Prezidenti Republika sira. 

Ho nune’e, Xefe estadu husu deskukpa ba Diretora, edukador no alunus sira tanba laiha presente ida prepara hodi fob a diresaun eskola Infantil. 

 “Hau husu Deskulpa,” PR Taur hato’o ba Diretora, ho nune’e Diretora ne’e mos simu ho laran kontenti, tamba xefe estadu ho domin ne’ebe mak boot tebes ba alunus sira.

 Iha nia lian menon, Xefe Estadu hato’o katak, sei fo apoiu nafatin, liuliu sei koalia ho parte governu hodi toma konsiderasaun ba estudante dalan ninin sira. 

.