Bloku Koligasaun Apoia Xanana Remodela Governu; “FRETILIN Seidauk Deside Atu Tama Governu”

.

Jornal Nacional Diario - Sesta-feira, 21 Junho 2013 

Governu Bloku Koligasaun hela deit fulan ida ho balun tinan ida Governa Kintu Governu Konstitusional, kompleta tinan ida Governasaun iha loron 8 fulan Agusto mai ne’e, dadaun ne’e iha ona informasaun neebe la’o iha komunidade nia let katak, Primeiru Ministru sei halo remodelasaun Governu, no mos remodelasaun Governu ne’e, Primeiru Ministru Kay Rala Xanana Gusmao sei konvida mos Partido FRETILIN atu tama Governu. 

“Atu hadia buat ida ne’e ami apoiu medidas saida deit, Sr. Primeiru Ministru hola, ami hein katak Sr. Primeiru Ministru iha dadus, bazeia ba dadus ne’e nia kompetensia atu mantein Ministru sira ou troka Ministru sira ne’e, tanba ita tenke ser lao ba oin, se ital abele tau iha ne’eba halo saida? Ministru mak labele e halo jestaun ladiak troka, tau ema ida ne’ebe mak bele para servisu lao ba oin,” dehan Deputadu husi Bloku Koligasaun, Bancada CNRT, Pedro da Costa Martires ba JNDiario hodi responde ba informasaun sira ne’e. Deputadu CNRT ne’e mos dehan katak, Ministru ne’ebe servisu la diak tenke fo fali ema sleuk nebe bele atu nune’e bele halo dezenvolvvimentu iha nasaun ne’e. 

“Bah au nia hanoin mak ne’e, tenki-ser hadia uma laran no hadia servisu, se servisu la diak, diak liu fo kompetensia ba Primeiru Ministru mak desidi iha ne’eba, se mak diak, se mak bele ba tur iha fatin ne’ebe ke kapas i nia iha kapasidade ne’ebe ke nia iha, labele tau ema ida la iha kapasidade iha fatin ne’ebe ke la merese,” dehan Pedro da Costa. 

Tuir Pedro,”durante ne’e membru Governu sira balun servisu diak e balun la dun diak, balun ladiak ne’e kritika husi reprezetante povu nian bai-bain, populasaun jeral bai-bain, tanba dehan sira nia nesesidades, sira nia preokupasoens Ministeriu rasik la rezolve, pruzemplu ita tau tiha orsamentu iha orsamentu Jeral do Estadu ba iha manutensaun ba rehabilitasaun estradas, maibe fulan 6 ona estrada sira ne’e la hetan reablilitasaun, ou ita tau tiha ona osamentu ba sinais tranzito (Lampu tranzito), maibe sinais tranzito ne’e nafatin deit, i ita koalia barbarak maibe la halo,” koalia Pedro. 

Nune’e mos deputadu Bancada Partidu Demokratiku (PD), Paulino Monteiro Saores Babo, haktuir remodelasaun ne’e kompetensia PM Xanana Gusmao nian, tanba ne’e nia parte seidauk koalia asuntu ne’e. 

“Remodelasaun ida ne’e kompetensia Primeiru Ministru nian, oinsa mak atu hare ba remodelasaun sedu, kazu iha Governu mak iha Ministru ka Sekretariu Estadu ou Diretor balun mak dala ruma halo sira nia kna’ar ne’e, Primeiru Ministru mak iha kompetensia liu atu hasai no atu hatama,” afirma Deputadu Paulino. Iha parte seluk kona ba informasaun ne’ebe ha katak, remodelasaun ne’e atu involve mos partidu FRETILIN nian iha Governu, maibe Prezidenti Partidu FRETILIN, Francisco Guterres Lu-Olo hateten, FRETILIN seidauk desidi tama Governu. Informasaun ne’ebe espailha katak, iha remodelasaun ne’e, Prezidenti Partidu FRETILIN, Francisco Guterres Lu-Olo sei assume kargu Ministru Defeza e Seguransa (MDS), Jose Agustinho Sequera ‘Somocho’ sei assume kargu sekretariu Estadu Seguransa (SES). 

“To’o ate agora data hau hatete tan dala ida katak, nein FRETILIN la rona no la hatene kona ba remodelasaun, se mak koalia remodelasaun so ema sira ne’ebe kaer governu, ne’ebe FRETILIN la hatene nia atu ba ka laba, hau so hateten deit katak, FRETILIN kontinua nafatin iha opozisaun,” deklara Prezidenti Partidu FRETILIN, Francisco Guterres Lu-Olo ba JNDiario iha nia rezidensia foin lalais ne’e. Presidenti Partidu ne’ebe halo istoria FRETILIN, Francisco Guterres ‘Lu-Olo’ haktuir, ate agora FRETILIN sei assume nafatin papel opozisaun ho karakteristika fo hanoin no ideia hodi kontribui ba Dezenvolvimentu Timor-Leste. 

“Ami sei assume nafatin papel opozisaun ninian ba iha GOvernu ne’e, maibe opozisaun ida ho karakteristika ho oin seluk para atu bele fo ajuda nafatin ba sira ne’ebe kaer ukun, liu husi hanoin para lori ita nia rain ida ne’e ba diak, e se la diak nafatin klaru kea mi sempre hola nafatin pozisaun para atu bele kritika,” koalia Lu-Olo. 

,