Dezenvolvimentu Mosu De’it IHa Dili: “Povu Moris Kiak Iha Rural”

.

Jornal Nacional Diario - Kinta-feira, 27 Junho 2013 

Observasaun Sosiedade sivil nian ba dezenvolvimentu ne’ebe mosu durante tinan 10 nia laran mak dezenvolvimentu ne’ebe mosu de’it iha kapital Dili, maibe iha area rural povu kontinua moris kiak no dok husi dezenvolvimentu infraestrutura baziku ne’ebe tuir lolos sai direitu fundamental ba povu. 

 “Ita seidauk bele dehan, dezenvolvimentu area rural ne’e sufisiente, tanba ita haree dezenvolvimentu barak liu iha kapital mesmu ke iha area balun de’it,” informa Staff advocacy ONG FORUM, Viriato Soares Pereira ba JONDiario iha edifisiu CNE Caicoli, Dili, Kuarta (26/6). 

 Nia deklara, realidade FONGTIL ho nia membru sira ba halo advokasia no kapasitasaun iha area rural susar hela ba dezenvolvimentu infraestrutura liu-liu iha parte estrada, eletrisidade, kanalizasaun bee mos, edukasaun, saude no folin nesesidade baziku nian. 

Nia hatutan, ema sira iha area rural ne’e la senti dezenvolvimentu ida, nune’e husu Governu atu aselera planu hodi lori naroman ba iha area rural hodi povu bele senti benefisiu husi ukun an ne’e. 

“Ami espera katak ho politika desentralizasaun bele hakbesik dezenvolvimentu ba povu iha area rural, nune’e ema hotu bele senti ukun an,” tenik nia. Antes ne’e, Diretur Ezekutivu ONG Luta Hamutuk, Mericio Akara, komenta katak, iha aldeia, Suku, Sub Distritu husi Distritu 13 haleu hotu ona, maibe laiha dezenvolvimentu ne’ebe iha, maske lao maibe laiha kualidade de obra, tanba kompania sira halo la tuir sentidu de nasionalizmu no patriotismu, buka deit mak osan hatama bolsu no ba pasiar inklui Governu la halo monitorizasaun no manutensaun ba projeitu.

.