“Trabalador Infantil Kontinua Barak Iha TL”

.

Sábado passado no Largo de Lecidere

Jornal Timor Post - Sabadu, 15 Junho 2013 

Maske Timor Leste iha ona lei hodi halo protesaun ba labarik, maibe realidade labarik barak sei kontinua hala’o serbisu hanesan trabalador infantil. 

Ba jornalista sira, hafoin komemora loron mundial trabalador Infantil, iha Largu Lecidere, Kuarta (12/6), Komisariu ba Diretu labarik Adalgisa Ximenes rekonese katak durante ne’e labarik minoridade barak iha Timor Leste hala’o servisu todan hanesan halo to’os, natar no fa’an sasan hodi akuda inan aman sira. 

 Ne’eduni, nia husu ba inan-aman sira, professores atu fo atensaun ba direitu labarik sira nian atu hetan asesu edukasaun no halimar, tanba wainhira obriga labarik sira servisu ho idade minoridade viola ona labarik sira nia direitu. 

Iha parte seluk, Sekretariu Estadu Formasaun Profesional Emprego (SEPFOPE), Ilidio Ximenes mos rekonese katak, realidade ne’ebe mosu iha Timor Leste hatudu labarik barak fa’an amnutolun, sabaraka no sigaru iha dalan ninin, no pior liu tan labarik balun ajuda inan-aman suru raihenek iha mora laran maske tuir lei, viola ona labarik sira nia direitu. 

Tanba ne’e, nia husu ba inan-aman, profesores no komunidade atu fo diretu ba labarik sira hodi asesu ba edukasaun, tanba futuru nasaun iha labarik sira nia liman. 

.