“Xanana Ko’alia Problema Polisia Vs Deputadu”

.

Jornal Timor Post - Sesta-Feira, 14 Junho 2013 

“Hau dehan bei-beik ba Polisia katak, momentu ida ne’e ita impede, asoens ne’ebe estraga ema seluk nia vida, ita vida asiste jogu la’os lori fali besi pedasku ida, Estadu Direitu no Demokratiku ne’e katak, ema tomak iha lei no orden nia okos, laos ida-idak defende ninia direitu, depois uja sala demokrasia ita hakilar malu arbiru”. 

 Afirma Xanana Gusmao ba Jornalista sira, Kinta (13/6), hafoin hasoru malu ho Prezidenti Republika, Taur Matan Ruak iha Palasaiu Prezidensial, Bairu-Pite, Dili. 

Maske nune’e, Xanana hateten, nia labele halo komentariu tanba komisaun sei halo hela investigasaun. Problema membru polisia husi Unidade Taks Force baku deputadu Manuel Castro husi Bancada FRETILIN, iha loron 31 Maiu, iha Audian, Dili, tanba Polisia halo atuasaun ba joven ne’ebe kontra lei no orden, no deputadu tenta sata netik, no ikus mai oknum polisia baku no tolok deputadu refere. 

Ministeriu Defesa no seguransa (MDS) liu husi Sekretariu estadu seguransa (SES) forma ona komisaun ida hodi halo investigasaun lolos ba kazu ne’e tanba informasaun ne’e hamosu husi parte ida katak, membru PNTl la baku no parte seluk dehan PNTL baku membru Parlamentu Nasional. 

“Mas problema ne’e hau lakohi komentariu katak, ida ne’e mak los ka ida mak sala, mais problema nee iha investigasaun tanba ne’e ita hein, depois lori ba Parlamentu nasional para apresia,” Sublinha Xanana.

 Entertantu, sobre Komandante Jeral PNTL foun ne’ebe maka atu troka atual Komisariu PNTL, Longuinhos Monteiro, katak xefe governu ne’e, kinta (13/6) iha enkontru konsellu Ministru ekstraordinariu hodi deskute asuntu ne’e. 

“Hau hasoru malu tiha ona konsellu superior polisia rona sira, no hau haruka sira hakerek sira nia hanoin no komisaun B, surat ne’ebe mak hau simu husi konsellu superior, polisia ida-idak hau entrega ona, Prezidenti Republika nune’e ita kumpriende konsellu superior nia opiniaun, tanba ne’e aban (ohin-red) ami deskute depois maka ami bele informa,” hateten Xanana. 

.