“Eis Membru Governu Barak Tama Radar Investigasaun KAK”

.

Jornal Independnete - Tersa-feira, 25 Junho 2013 

 Hafoin hetan mandatu legal husi estadu, Komisaun Anti Korupsaun (KAK) identifika ona eis membru Governu barak ne’ebe sei tama prosesu investiga, tanba envolope kazu mal administrasaun, abuzu poder no korupsaun. 

 Komisaun KAK, Aderito de Jesus Soares, la hateten klaru kona ba numeru kazu no tipu kazu ne’ebe eis membru governu sira komete, maibe kazu hirak ne’e iha ona prosesu nia laran. 

“Oras ne’e dadaun eis membru balun, KAK haruka ona ba Tribunal no balun halo ona julgamentu, maibe eis membru Governu balun sei iha prosesu investigasaun,” dehan nia iha Sentru Convensoes Dili (CCD), foin lalais ne’e. 

Nia rekonese katak, kazu hirak ne’ebe KAK aprezenta ba tribunal, lubuk ida mak envolve ona governante balun. Tuir Komisariu Aderito, KAK oras ne’e dadauk iha koordenasaun diak ho Ministeriu Publiku (MP) inklui sosieade sivil hodi luta kontra korupsaun iha Timor-Leste. 

Nia hatutan, prosesu investigasaun ba kazu korupsaun ne’ebe akontese iha Timor, presiza lao neneik, tanba tipu kazu hotu-hotu tenki bazeia ba lei. Nia dehan, KAK servisu bazeia deit ba lei, lakohi servisu dook husi lei, tanba KAK nia servisu mak trata ema hotu-hotu iha lei nia okos kuandu komete kazu korupsaun ruma. 

Aderito mos hatutan, kombate korupsaun presiza lao neneik atu bele identifika koruptu sira ba Tribunal, ne’ebe kombate korupsaun laos ohin loron deit, presiza tetu didak, labele ansi. 

“Hanesan halai maratona, tenki kuidadu ita nia iis, labele to’o iha dalan klaran de’it, garis finish la to’o,” dehan nia. Komisaun KAK ne’e mos iha esperansa iha tempu ida instituisaun ne’e bele la’o diak liu tan hodi luta kontra korupsaun, tanba motto KAK hateten, “Bele sai riku, maibe la’os ho korupsaun”. 

 “Ha fiar katak, loron ida KAK sei servisu lalais, tanba kestaun tarde sai hanesan problema nasional, hau sente la’os KAK mesak mak servisu,” nia hateten. 

Antes ne’e, Primeiru Ministru Kay Rala xanana Gusmao husu ba Komisaun Anti Korupsaun atu investiga eis membru deputadu sira ne’ebe oras ne’e deskonfia riku matak bainhira remata sira nia mandatu. 

Nune’e, sadik Komisaun Anti Korupsaun atu investiga mos nia, tanba Xefe Governu konsidera KAK la seriu atu servisu. 

,