“Relatoriu Ezekusaun OJE Ba SEPFOPE Kontradis”

.

Jornal Independente - Sesta-feira, 21 Junho 2013 

Relatoriu Ezekusaun Orsamentu Jeral EStadu (OJE) ba Sekretariu Estadu Politika Formasaun Profesional no Empregu (SEPFOPE) iha buat balun laloos, tanba relatoriu ne’ebe mak SEFPOPE hasai diferensa ho relatoriu Ministeriu Finansas nian. 

Tuir Realtoriu ne’ebe SEPFOPE hasai katak, ezekusaun orsamentu husi fulan Janeiru to’o Junu iha gabinete sekretariu Estadu ne’e atinji ona porsentu 78,12 (%) husi total orsamentu tokon U$12,953,000. Sekretariu Esatdu, Ilidio Ximenes hateten, ezekusaun OJE 2013 nian ba salariu no vensimentu hamutuk U$739.311 ka 42.91%, bens no servisu 44,84%, kapital dezenvolvimentu porsentu 100.00% ho total ezekusaun hamutuk U$1.252.640. 

Tanba ne’e, hahu fulan jullu ba oin SEPFOPE sei ‘deskansa’ ba ezekusaun orsamentu nian, tanba servisu hala’o hotu ona. “Ami iha fulan neen (6) nia laran ne’e halo deit ona monitorizasuan ba projeitu empregu rural no ba sentru treinamentu sira ne’ebe mak ami suporta, tanba ami nia orsamentu ezekusaun hotu ona,” dehan Ilidio, iha nia servisu fatin, Kaikoli Dili (18/6). 

Nia hatutan, kuandu iha osan adisional ruma atu responde ba nesesidade povu nian, SEPFOPE rasik pronto atu ezekuta. Haree ba relatoriu ezekusaun OJE ba SEPFOPE nian ne’ebe atinji ona 78%, Adjuntu Diretor PNG Luta Hamutuk, Joazito Viana konsidera realtoriu ne’e falsu, Relatoriu Ezekusaun OJE 2013 nian ne’ebe Organizasaun Luta Hamutuk asesu husi Ministeriu Financas (MF), Ezekusaun OJE iha SEPFOPE nian foin atinji 7,9%. 

 Deskrisaun relatoriu ne’ebe fo sai hateten, item komprimisio total orsamentu U$8.310.191 ka 64,2%, item obrigasaun total orsamentu U$480.183 ka 3.7%, item ba servisu real U$1.021.928 ka 7,9% no osan saldu ne’ebe sei hamutuk $3.140.696 ka 24.2%. 

Nia dehan, relatoriu ezekusaun loloos orsamentu labele konta ho item komprimisio no obrigasaun, tanba sei iha prosesu laran, tanba projeitu sira ne’ebe tam iha item rua ne’e mak la konsege implementa, signifika katak niania orsamentu mos la ezekuta. 

 “Ita tenki onestu hodi fo ezekusaun orsamentu loloos ne’ebe mak ita halo ona, labele s’e rai –rahun ba povu nia matan,” tenki Joazito. 

Nia esplika liutan, item komprimisio katak, projeitu ka planu ne’ebe foin hatama iha prosesu hodi halo tenderizasaun, nune’e obrigasaun katak, prosesu tenderizasaun ne’ebe la’o ona no hein ninia implementasaun. 

Maibe, Joazito dehan, kuandu SEPFOPE halo ona ezekusaun ho montante boot hanesan ne’e, entaun tenke relata ba MInisteriu Financas hodi hatama ba relatoriu ezekusaun OJE nian, ne’e duni, fallansu ne’e tamba SEPFOPE maka hakarak taka aan ba prosesu ezekusaun OJE iha sira nia gabinete. 

.