“Sai Ukun Na’in Tenki Onestu no Labele Naok Ten”

.

Jornal Timor Post - Tersa-feira, 18 Junho 2013 

Ministru Administrasaun Estatal (MAE), Jorge da Concecao Teme hateten, sai ukun nain labele kanten, loko a’an no naok ten. 

“Ita nia povu hakarak ukun nain ne’ebe onestu, hakraik a’an, no respeita ba povu nia riku soin, maibe labele sai ukun nain ne’ebe kante’en, loko a’an no naok ten, ne’e ita nia povu koalia,” dehan Jorge Teme hafoin abertura seminariu Desentralziasaun Administrativa no poder lokal iha instituisaun Superior Cristal (ISC), Balide, Sabado (15/6). 

 Nune’e, atu hata’an ba povu nia preokupasaun, nia parte mos tu’un diretamente ba povu sira iha baze hodi rona no simu saida maka povu koalia tanba povo sira to’o ohin loron sei kontinua halerik nafatin ba dezenvolvimentu. “Hau ba suco sira, hau dehan, hau rona, hau simu saida mak ita nia povu koalia tanba ita nia povu sei halerik nafatin to’o ohin loron,” Jorge fo hanoin. 

Iha parte seluk, Ministru ne’e dehan, Timor Leste iha riku soin no iha osan maibe kapasidade atu distribui rikusoin sira ne’e sei iha problema tanba ne’e presiza entidades hotu tau hanoin hamutuk nune’e bele distribui riku soin sira ne’ebe iha. 

 “Ita hetan ona ita nia riku soin, embora ita sei iha problema, riku soin iha ita nia rain, ita sei iha osan maibe ita nia kapasidade atu distribui ita nia riku soin ne’e depende ita,” nia sujere. 

Aleinde ne’e, Ministru ne’e mos husu ba jerasaun foun sira atu prepara an hodi estuda maka’as nune’e bele troka fali jerasuan tuan sira iha futuru mai ho diak liu tan para lori dezenvolvimentu nasaun ne’e ba oin. 

 “Hau husu ba estudante sira labele fo sala deit ba governu maka la diak, diak liu estudante sira mak tenke dehan pronto atu troka membru governu sira para ba aban bain rua ne’e halo didiak liu tan, ida ne’e mak importante,” nia dehan. 

.