“CPD-RDTL Sujere Veteranus Komanda PNTL”

.

Jornal Nacional Diario - Tersa-feira, 18 Junho 2013 

Conselho Popular Defeza-Republica Demokratica Timor-Leste (CPD-RDTL), sujere ba Primeiru Ministru Kay Rala actual Ministru Defesa no Seguransa atu monta ema veteranus ida sai komandante Jeral (Komjer) Policia Nacional Timor Leste (PNTL). 

CPD-RDTL sita katak, sira la aseita totalmente ho informasaun ne’ebe dehan PM xanana kontinua prolonga tan mandatu actual Komjer PNTL Longuinhos Monteiro laos ba husi kareira professional Policia nian. 

 “CPD-RDTL la aseita total atu PM Xanana prolonga tan mandatu Longuinhos Monteiro nian, tamba tuir ami nia hakarak tenki tau ema nain rua, ida mai husi ema veteranus ida hanesan F-FDTL nian Lere Anan Timur, ne’ebe iha domin boot ba komunidade sira no ida seluk fali se bele tau membru Policia sira ne’ebe mak profesionalizmu no hasai kursu barak ona kona-ba lideransa nian iha nasaun bar-barak,” Hateten Prezidente CPD-RDTL, 

Antonio Aitahan-Matak ba Jornalista sira iha balide, Dili, Segunda (17/6). Tuir Matak, PM xanana mak hili nafatin Longuinhos Monteiro ne’e la diak, tanba nia hasai prokurador Jeral no advogado nian, no Longuinhos sai Komisariu PNTL problema barak mak akontese iha instituisaun PNTL nia laran. 

Tanba ne’e, CPD-RDTL konkorda dia 27 agora mandatu Longuinhos Monteiro nian tenke remata, labele prolonga tamba Longuinhos ne’e mos laos ema kareira Profesional husi Policia. 

Antonio Aitahan Matak mos konkorda wainhira PM Xanana, foti Longuinhos Monteiro sai hanesan Ministru, Prezidenti Prokurador Jeral, Sekretariu Estadu ka Embaixador TL ba nasaun balun, laos nafatin hanesan Komjer PNTL lae. Iha fatin lahanesan, tuir Diretur Fundasaun Mahein, Nelson Belo, nia hare katak, desizaun ne’ebe mak karik PM hasai ida ne’e hanesan desizaun politika nian maibe atu diak liu tan, ne’e make ma ne’ebe atu sai Komjer PNTL ne’e tenki mai husi instituisaun ne’e rasik. 

“Ida ne’e desizaun Politiku nian no durante ne’e husi Komisaun B Parlamentu Nasional (PN) nian hamutuk ho sosiedade sivil ho instituisaun Estadu rasik iha rai ida ne’e kestiona katak, ita nia lei hateten ona Komjer PNTL mai husi instituisaun ne’e rasik atu fortifika hirarkia iha instituisaun laran no instituisaun ne’e rasik para hala’o kna’ar ne’e ho professionalismu, dala ruma politiku nain sira haree ema iha instituisaun nia laran la’os laiha maibe karik seidauk pronto, tanba ne’e ami husu atu se deit mak sai konjer tenki kontinua halo relasaun diak no servisu hamutuk,” hateten nia. 

 Iha parte seluk, tuir fontes konfirmadu husi Policia Nacional Timor Leste (PNTL) hatete, foin lalais sira halo reuniaun Conselhu Superior sira desidi kandidatura ba Komjer PNTL hamutuk nain 3, hanesan segundu Komandante Jeral PNTL, Komisariu Afonso de Jesus, Mateus Fernandes no ida seluk seidauk hatene lolos. 

,