“LH Konsidera Korupsaun Sei Impata Dezenvolvimentu Iha TL”

.

Notisia Husi TVTL - Tersa-Kalan, 18 Junhu 2013 

Organizasaun Luta Hamutuk (LH) husu ba komisaun Anti Korupsaun (KAK) atu kontinua halo servisu independente hodi investiga kazu korupsaun. 

Luta Hamutuk mos husu ba Parlamentu Nasional (PN) no Tribunal Rekursu atu reviw hikas kodigu prosesu penal ne’ebe sai obstaklu ba servisu KAK. Liu husi konferensia imprensa ne’ebe hala’o tersa-feira (18/6) ne’e, organizasaun Luta Hamutuk husu ba parte kompotente atu servisu ho independente hodi halo investigasaun ba koruptores sira. 

“Ezizi ba Ministeriu Publika atu aselera prosesu investigasaun ba akuzasaun kazu 40 resin ne’ebe rekomenda husi KAK iha tinan kotuk, husu ba Komisariu KAK atu mantein pozisaun nafatin nuudar komisariu ne’ebe mak independente no aten brani hodi prosesu investigasaun kazu korupsaun, husu ba Parlamentu Nasional atu aselera enkuadramentu legal sira ne’ebe mak importante hodi suporta servisu KAK no Ministeriu Publiku, mak hanesan, Lei Anti Korupsaun, Lei deklarasaun Rikusoin, husu mos ba PN atu reviw fila fali kodigu prosesu penal neebe mak durante ne’e sai ostaklu ba servisu KAK iha prosesu investigasaun,” deklara Mericio Akara. 

Mercio Akara mos hatutan, kauza husi Korupsaun mak sei impata dezenvolvimentu iha nasaun ida, tamba difisil ba investors atu investe iha Timor no povu sei kontinua moris iha mukit nia laran. 

Diretor LH ne’e mos apresia ho serviso komisaun Anti Korupsaun ne’ebe halo investigasaun ba koruptores sira no husu ba netidades sira atu fo apoiu ba Komisaun Anti Korupsaun hodi kombate korupsaun iha Timor Leste.

.