“KAK Maten, Ema Balun Riku-Matak”

.

Jornal Independente - Segunda-feira, 17 Junho 2013 

Primeiru Ministru Kay Rala Xanana Gusmao konsidera hahu baruk ona atu investiga koruptor sira tanba realidade ema balun riku-matak hafoin remata ninia mandatu iha instituisaun estadu. 

 PM Xanana dehan, KAK durante ne’e la kria estratejia ne’ebe seriu hodi investiga membru Parlamentu Nasional no Membru Governu sira. Xanana husu ba KAK atu loke investigasaun ba eis deputadu no eis membru governu ne’ebe daudauk ne’e riku matak. 

“Hau hakarak aviza KAK, dala ruma servisu baruk ona, KAK o servisu ba, ami sai hotu, tamba membru Parlamentu inklui membru governu balun remata tiha governasaun riku tasak didiak,” katak PM Xanana. 

Antes ne’e, Xanana sadik mos KAK atu investiga nia ba konstrusaun Ponte Komoro II ne’ebe kaer husi Consorsio Nasional Timorense (CNT) parseira ho kompania WIKA Indonezia nian ho razaun la iha transparansia. 

“Hau simu osan husi CNT, ne’e hau sala, hau simu osan husi WIKA hau sala, tanba ne’e hau sei la tauk KAK atu lori hau to’o iha ne’ebe mos hau pronto ba hodi hasoru malu ho KAK,” katak nia. 

Tuir planu, iha sabadu foin lalais PM Xanana hala’o reuniaun ho KAK maibe la konsege tanba Xefe Governu ne’e preokupa ho servisu seluk. 

,