“Longuinhos Sei Tetu Desizaun KS”

.

Jornal Independnete - Tersa-feira, 25 Junho 2013 

Komandante Tranzitoriu ba Polisia Nasional Timor-Leste (PNTL) Komisariu Longuinhos Monteiro sei tetu desizaun Konsellu Seguransa (KS) ne’ebe prolonga tan nia mandatu ba tinan rua. 

Komandu PNTL ne’e dehan, to’o oras ne’e nia seidauk hetan karta despaisu husi Sekretariu Estadu Seguransa (SES) ou Ministru Defeza no Seguransa (MDS) ba nia mandatu extra-ordinariu ne’e. 

“Hau seidauk simu karta despaixu kona bah au nia mandatu foun ne’e,” hateten Longuinhos ba Jornalista sira iha Kuartel Jeral PNTL, Kaikoli (14/6). 

Mandatu tranzitoriu sei remata iha loron 27 fulan-Junu tinan ida ne’e, no sei kontinua nu’udar komandante extra-ordinariu tuir desizaun Konsellu Seguransa ba tinan rua oin mai (2013-2015). Maibe, tuir nia, mandatu foun ne’e nia seidauk bele koalia tanba mandatu tranzitoriu seidauk remata. 

“Hau sei koalia iha loron 27 fulan ida ne’e, wainhira hau nia mandatu estra-ordinariu remata,” dehan Longuinhos. 

Antes desizaun KS fo sai, komandante Longuinhos fo sai ona ba publiku katak, nia hetan ona tawaran ida ne’ebe boot liu fali kargu komandate Jeral PNTL nian agora ne’e, maibe sei estadu kontinua fo fiar ba nia atu lidera PNTL nia pronto nafatin. 

Entertantu, Parlamentu Nasional husi Komisaun B (trata asuntu negosiu Estranjeiru, Defesa no seguransa Nasional), sosieade sivil no publika kontinua fo hanoin ba komandante Longuinhos atu hadia tan displina membru Polisia Nasional Timor-Leste. 

Presidenti Komisaun B, Trata asuntu negosiu Estranjeiru, Defeza no seguransa Nasional, Maria Lurdes Bessa hateten prolongamentu kandatu komandante Jeral PNTL ne’e desizaun husi Konsellu Ministru maibe sira nia parte husu deit atu hadia displina ba membru PNTL, liu-liu halo avaliasaun ba servisu durante nia mandatu. 

“Ha’u sujere de’it ba komandante jeral atu hadia no forma membru Polisia sira atu hala’o kna’ar ho profesionalizmu tuir lei no orden,” dehan iha CCD foin lalais. Iha fatin hanesan, membru Komisaun A, Cesar Valente de Jesus dehan, komandante Jeral tenke haka’as aan hodi hadia failansu neebe durante ne’e polisia sira hasoru, liu-liu hadia displina servisu atua situasaun ho profesionalizmu. 

 “Hau ezizi komandante Jeral atu haka’as aan hadia buat hirak ne’e antes akontese prevensaun operasaun no transforma estratejia servisu, liu-liu displina iha atuasaun ba konflitu ruma. Entertantu, Vice Diretur Fundasaun Mahein (FM) Joao Almeida hateten katak, mandatu foun ba komandante Jeral PNTL ne’e hanesan sadik no obstaklu ba dezenvolvimentu instituisaun. 

“Ami haree katak, importante Longuinhos (KOmisariu PNTL) tenki hadia diak liu tan buat ne’ebe mak seidauk atinji kona ba kna’ar PNTL nian hanesan ezekusaun lei no orden, importante mak hadia diak liu tan lei no orden, liu-liu iha pratika implementasaun tuir lei ninian,” Hateten Joao Almeida foin lalais nee. 

.