“Taur: Tau Matan Ba Ekonomia Duke Lia”

.

Jornal Timor Post - Segunda-feira, 17 Junho 2013 

Prezidenti Republika (PR), Taur Matan Ruak kestiaona maka’as povu tomak iha Timor-Leste tanba preokupa liu halo lia mate no lia moris duke hadiak ekonomia familia uma laran. 

“Hau hakarak sidadaun tomak tau matan ba ekonomia familia uma laran, ne’e importante, maibe hau preokupa ita nia sidadaun sira halo lia mate, lia moris, konfia kuda, karau hodi halo lia,” PR Taur hateten ba komunidade sira iha Beduku, Likisa, Sesta (14/6). 

Atu minimiza haktu hirak ne’e, xefe estadu husu atu nune’e povu sira lori sira nia oan ba eskola no hadiak saude duke lori animal hola osan para halo lei deit. 

“Hau husu komunidade sira kontribui maka saude, hadiak oan sira nia saude, fo hahan diak para oan sira isin diak, nune’e ba eskola buka matenek,” PR Taur dehan. 

Xefi Estadu dehan, Timor halo lia mate no lia moris barak la hatene lori osan husi ne’ebe karik, maibe ladun importa fali oan sira nia saude no edukasaun. Makes nune’e xefe estadu elojia tebes Distritu ermera ne’ebe mak aprioridade hadiak vida familia liu husi rikeza kafe hodi lori oan sira ba eskola. 

 “Hau elojia tebes tanba Ermera iha ona tarabandu ne’ebe mak organiza husi eis Prezidenti da Republika, Ramos Horta ho Amu Bispo Alberto Ricardo hodi labele halo lia arbiru, kuandu halo lia, oan sira tenki eskola hetan mestradu ka diploma universitariu mak halo festa dala ida,” dehan Taur. 

Tuir nia, kontribuisaun povu nian iha independensia oinsa hadiak ekonomia no hadiak saude inklui lori osan sora ba asesu edukasaun para hetan matenek diak, nune’e dezenvolve nasaun. 

,