“Programa Merenda Eskolar Iha Lautem Paradu”

.

Jornal Nacional Diario - Sesta-feira, 28 Junho 2013 

Reprezetante povu iha uma fukun Parlamentu Nasional (PN) informa, Programa merenda eskolar durante ne’e iha Distritu Lautem paradu tamba iha tinan ida nia laran, programa merenda eskolar ne’ebe organiza husi Ministeriu Edukasaun (ME) seidauk implementa iha eskola sira iha Distritu Lautem. 

Deputadu Aurelio Freitas Ribeiro husi bancada FRETILIN hato’o kestaun ne’e ba JNDiario iha Parlamentu Nasional (PN), kinta (27/6). 

“Merenda eskolar to’o ohin loron seidauk implementa, atu tinan ida ona seidauk implementa,” dehan Aurelio iha plenaria foin lalais. Aurelio dehan sistema implementasaun merenda eskolar iha Distritu Lospalos sai preokupasaun ba autoridade lokal sira iha Distritu refere. 

“Sira (autoridade local Distritu Lospalos) husu merenda eskolar ne’e tinan ida la’o fulan hira, sira husu tanba laiha transparensia konaba ida ne’e,” dehan Aurelio. 

Alen-de problema merenda eskolar, Aurelio dehan, falta meja kadeira mos sai preokupasaun ba povu iha Distritu Lospalos tanba eskola barak sei falta meja no kadeira. 

 “Eskola iha ida Cai, iha tinan ida liu ba governu atu loke eskola foun ida iha ne’eba maibe tanba iha konflitu ho problema rai, to’o agora seidauk implementa i estudante kuaze 900 ital tuur iha rai deit,” dehan Aurelio. 

Tamba ne’e, Aurelio husu Ministeriu Edukasaun tenki rejolve problema hirak ne’ebe mak eskola sira iha Distritu Lospalos infrenta. Hata’an ba kestaun ne’e, Sekretariu Estadu Asuntu Parlamentu Nasional, Terezinha viegas hatete, nia parte sei hato’o informasaun ne’ebe mak deputadu foti ba iha Ministeriu Compotente hodi rejolve. 

.