“Australia Bele Lakon Direitu Ba Greater Sunrise”

.

Jornal Independente - Tersa-feira, 18 Junho 2013 

Australia bele lakon nia direitu ba mina no gas iha kampu Greater Sunrise no kampo sira seluk kuandu fronteira mak lina median, dehan Ministru Rekursu Naturais Alfredo Pires. 

Tuir akordu Greater Sunrise ne’ebe asin husi Governu Timor-Leste no Australia iha 2006 hatete asuntu Fronteira foin bele deskute hafoin explorasaun ba mina no gas iha kampu Greater Sunrise lao tinan 50. 

 “Ida ne’e mak tratadu ne’ebe halo Timoroan sira preokupa, kuandu lina median mak Fronteira, Greater sunrise no kampu barak seluk sei monu ba Timoroan sira nia tasi,” dehan Ministru Alfredo, hanesan media “The Economist” hakerek. 

 Nia dehan linha fronteira halo defisil prosesu planeamentu no atrai investimentu, bainhira akompania Primeiru Ministru Xanana Gusmao ba Singapura foin dadauk ne’e, Ministru Alfredo dehan Australia la hatudu hanoin diak durante negosiasaun kona-ba Greater Sunrise nian mai tau iha kosta Soul nasaun nian, maibe kompania Australia Woodisde ho nia kolega sira hanesan Chonocophilips, Osaka Gas, no Shell la kohi, sira hakarak tau refinaria iha tasi leten iha kampu Greater Sunrise. 

Peritu ekonomiku nasional no internasional barak haree katak, kuandu lori pipeline mai Timor Leste, sei fo benefisiu boot ba Timoroan sira, inklui loke kampu servisu ba Timoaoan sira. Iha 2002, Timor-Leste konkorda lori Pipeline Kampu Bayu Undang nian ba Darwin, maibe ba Greater Sunrise, Parte Australia lakohi atu lori mai Timor-Leste. 

 Akordu Greater sunrise mate ona iha iha fevereiru tinan ida ne’e. Governu TL hakerek ona karta ba Australia hodi lori tratadu ne’e ba arbitrazen internasional, maibe governu Australia seidauk responde. Maibe, Administrasaun iha Canberra hateten ona ba publiku iha Australia foin dadauk katak, nia partes ei responde karta husi Primeiru Ministru xanana Gusmao nia governu. 

Maske, Governu Australia deside ona hodi aumenta nia apoiu finanseiru iha palku internasional hodi ajuda nasaun barak, maibe seidauk taka dalan ba nasaun sira seluk hodi fo apoiu solidaridade ba Timor-Leste hasoru Australia iha kompetisaun kona ba asuntu Greater Sunrise. 

Primeiru Ministru Xanana Gusmao foin dadauk hatete katak, nasaun balun iha ASEAN apoiu Luta Timor Leste nian ba mina no gas iha Greater Sunrise tanba sira hatene buat ne’e direitu Timor oan sira nian. ONG Nasional balun, inklui Lao Hamutuk, durante ne’e hatudu nia pozisaun katak, diak liu Governu Timor Leste rezolve uluk lai asuntu fronteira tasi molok koalia kona ba explorasaun. 

.