Sosieade Sivil sujere, “MP Aselera Prosesu Kazu Korupsaun 49”

.

Jornal Nacional Diario - Sesta-feira, 21 Junho 2013 

Sosiedade sivil sujere ba Ministeriu Publiku (MP) aseleira prosesu investigasaun no akuzasaun ba kazu 49 ne’ebe rekomenda husi komisaun Anti Korupsaun (KAK) iha tinan 2012, tanba kazu ne’e iha nuansa skandal publiku ne’ebe involve nivel Ministru, eis Ministru no Diretor sira. 

“Ami hetan kazu korupsaun husi 2011 mai 2013 hamutuk 49 mak agora iha MP maibe seidauk halo akuzasaun, nune’e ami husu aselera lalais prosesu investigasaun, tanba kazu ne’e involve nivel Ministru no Diretor sira,” Diretur Ezekutivu Luta Hamutuk, Mericio Akara, deklara asuntu ne’e iha nia kna’ar fatin Farol, Dili, foin lalais ne’e. 

Diretur Ezekutivu Luta Hamutuk Mercicio Akara hateten, KAK nu’udar instituisaun independenti ne’ebe hetan kna’ar halo investigasuan no prevensaun ba kazu korupsaun, durante KAK halo nia kna’ar, Luta Hamutuk rekonese KAK tata duni koruptor sira, maibe Ministeriu Publiku seidauk halo nia servisu masimu nudar nain ba prosesu penal. 

Luta Hamutuk husu ba KAK atu ho seriedade aselera prosesu investigasaun ne’ebe profunda ba kazu korupsaun ne’ebe iha indikasaun forte. “KOmisariu KAK tenki mantein pozisaun nuudar komisariu ne’ebe independenti no aten brani hodi prosesa investiga kazu korupsaun,” husu Mericio. 

Mericio afirma, PN tenki hanoin ona atu aselera enkuadramente legal hodi suporta servisu KAK no MP hanesan lei anti Korupsaun, lei deklarasaun rikusoin, lei rezimentu elisitu (memerkaya diri), lei unos de provas (pembuktian terbalik) inklui sira seluk. 

 LH mos husu PN no Tribunal Rekursu reviu fali kodigu prosesu penal ne’ebe sai ostaklu ba KAK, tanba prosedura ne’ebe defini iha kodigu prosesu penal fo espasu ba autor krime korupsaun. Antes ne’e mos, Diretur interinu Asosiasaun Hak Manuel Monteiro Fernandes enkoraja KAK atu halao nia servisu ho seridade labele tauk ba ameasa hodi lori koruptor ba hasoru lei. 

 ,