“Ses Rekonese Problema Iha PNTL Barak”

.

Jornal Nacional Diario - Sesta-feira, 28 Junho 2013 

Sekretariu Estado Seguransa (SES), Francisco Guterres, rekonese katak, durante ne’e problema mosu barak duni iha instituisaun Policia Nasional Timor-Leste (PNTL), hanesan falta ekipamentu no infraestrutura. 

SES haktuir, maske iha problema barak hanesan falta ekipamentu maibe buka atu tau orsamentu iha neeba. 

Kona ba asuntu infraestrutura, SES dehan, ne’e sei menus duni ne’ebe iha tinan ida ne’e mak foin atu tau maibe seidauk to’o entaun sei kontinua ba iha tinan 2014-2016. 

Nia mos hatutan katak, servisu PNTL nian durante ne’e la’o diak tebes, tanba antes ne’e SES servisu hamutuk ho NGO nasional no internasional sira hodi hadia instituisaun PNTL. 

 “Dezafiu ba sira mak falta ekipamentus no infra-estrutura, ital abele jeneraliza PNTL sira nia servisu barak mak iha ne’eba, hanesan kalan ita toba seguru ne’e parese iha ema ruma mak fo seguransa,” dehan SES Francisco. 

 SES Francisco mos husu atu entidade tomak, politiku sira labele kestiaona demais servisu PNTL nian ne’ebe ladun diak, maibe haree mos sira nia sakrifisiu ne’ebe sira halo hodi fo seguransa iha parte kalan, tamba iha parte kalan mak mosu problema sira pronto ba atua. 

SES Francisco haktuir tan katak, labele jeneraliza servisu Policia nian tanba dala barak publiku hateten PNTL baku ema, maibe atu dehan PNTL la baku ema, ne’e kestoens ida rua nian, tanba sira la kumpri regras PNTL nian ne’ebe iha tiha ona. 

“Dala barak publiku dehan, PNTL baku ema, sira la baku ema, maibe pessoal ne’ebe karik haree, tenki temi naran atu nune’e ami investiga mak sala ami sei hasia sira,” sublinha SES Francisco.

,