Membru PNTL Tiru Mate Joven 1 Iha Hera “Mariano Lakon Direitu Ba Salariu”

.

Jornal Nacional Diario - Kinta-feira, 27 Junho 2013 

Ajente Polisia Nasional Timor-Leste (PNTL), Mariano da Silva nebe Ministeriu Publiku (MP) alega tiru Armindo Pereira iha Hera loron 16 Jullu 2012, Tribunal Distrital Dili (TDD) fo ona sentensa tinan 16 kadeia. 

Ho sentensa Tribunal nian ne’e kondenado, Mariano da Silva Konfirmadu komete krime tan ne’e sei lakon direitu ba salariu no mos nudar membru instituisaun Polisia Nasional Timor-Leste (PNTL). 

Sekretariu Estadu Seguransa (SES), Francisco da Costa Guterres hatete, iha lei kona ba regulamentu displinar nia ne’e membru PNTL nebe komete krime hodi hetan sentesa husi tribunal ho pena liu tinan 3 laiha direitu atu hetan ninia vensimentu, nune’e mos lakon sireitu nuudar membru PNTL. 

“Kona ba ne’e, iha lei erjimentu displina nia labele hetan maibe hau lahatene se mak tama ona iha prizaun, hau seidauk haree mais ita hein katak, desizaun seidauk hotu tanba sira iha direitu atu halo rekursu ba TR, hau seiduak bele koalia buat ida,” SES Francisco Guterres dehan ba Jornalista sira iha salaun CNE, Kolmera, Dili, Kuarta (26/6). 

 Kazu Hera ne’e iha arguido ajente PNTL nain rua, Mariano da Silva no Agustinho da Costa, maibe desizaun TDD, tersa (25/6) kondena deit Mariano da Silva kadeia tinan 16 no absolve Agustinho da Costa, tamba laiha faktus ne’ebe aprezenta durante julgamentu. 

Liu husi leitura akordaun ne’ebe le sai husi Juiz Prezidenti Antonio Helder do Carmo katak, Tribunal kondena arguido Mariano ho pena prizaun tinan 16, tanba Tribunal ho objetividade tuir provas neebe mak produs iha audensia julgamentu orgaun de komunikasaun bar-barak to’o sira nia komentariu kona ba julgamentu ne’e rasik no Tribunal tenki esklarese katak, Tribunal rona testamunha hamutuk nain 11 inklui mos arguidu nain rua iha sira nia deklarasaun. 

Tribunal mos haree lolos ba dokumentus ne’ebe junta no nomeandomente inspesaun ba armas husi ajensia lubuk ida halo intervensaun ba fatin akontesementu tuir ezersisiu servisu. 

Husi sasin lubuk ida, iha sasin nain 7 hare direitamente oinsa arguidu Mariano da Silva halo konfrontu hasoru vitima, Momentu ne’eba, vitima tenta atu sa’e ba kareta leten sein halo atuasaun ruma hasoru arguidu Mariano, maibe arguidu hasai nia pistola rabat iha vitima nia kabun, ida ne’e Tribunal haree katak aprovadu duni no Tribunal laiha duvida ba krime ne’ebe pratika ba arguidu ho homesidu agravadu artidu 139 kodigu penal TL ho pena prizaun tinan 16. 

Kona ba desizaun ne’e parte defeza kondenadu Marinao da Silva Antonio sei aprejenta Rekursu ba Tribunal Rekursu durante loron 15 nia laran, tuir prazu tempo rekursu nian nebe iha. 

.