“PM Xanana Ameasa Taka UNDIL”

.

Jornal Nacional Diario - Segunda-feira, 17 Junho 2013 

Primeiru Ministru Kay Rala Xanana Gusmao ameasa taka Universidade Dili (UNDIL), kuandu estudante sira ne’ebe mak eskola iha ne’eba kontinua kria problema hodi baku rahun sasan sira ne’ebe mak eskola ne’e iha. 

“Hau hakarak taka Universidade ida ne’e, hau bele taka ohin la iha problema, tanba hau lakohi imi atu estraga rai ida ne’e iha loron ikus,” dehan PM Xanana hanesan mos Prezidenti BOAKRIL UNDIL, foin lalais ne’e iha eskola refere, bainhira estudante UNDIL hala’o asaun hasoru Governu. 

 PM Xanana afirma lia fuan hirak ne’e, tanba antes ne’e estudante UNDIL organiza asaun ida hasoru estrutura Universidade ne’e ho Fundasaun BOAKRIL. 

Prezidenti BOAKRIL ne’e husu ba estudante sira ne’e atu displina no respeita malu i tenki estuda maka’as hodi hanoin ba futuru. 

Eis lider rejistensia ne’e bolu atensaun ba estudante UNDIL tomak atu tuur hamutuk koalia ba malu hodi buka hatene problema saida mak agora dadauk ne’e sira infrenta. 

 “Hau lakohi probelema ne’e boot, kuandu problema ne’e boot iha solusaun rua, ida hau taka eskola ne’e, ou kaer imi lori ba komarka,” ameasa Xanana. 

Xefe Governu ne’e romete ba estudante sira katak, governu sei akompania sira hodi aumenta kualidade iha fatin hotu-hotu. PM xanana mos aviza ba estudante sira ne’e katak, ba oin nia lakohi atu rona tan problema akontese iha Universidade ne’e, kuandu akontese tan mak nia rasik sei taka universidade ne’e. 

Universidade laos atu kria kriminozu, maibe atu kria sidadaun foun, tanba ne’e atu sai sidadaun foun tenki respeita sasan ema nian, kuandu la gosta universidade ne’e sai deit. 

 Kampus ne’e atu sai ema ne’ebe kreativu hodi halo buat ne’ebe diak, laos kampus atu hatudu forsa. 

 “Imi falta respeitu, lia fuan ida traidor ne’e aat liu ba hau, tanba hau mka lori funu ne’e mai, se imi dehan hau gsta osan, imi bele lori hau ba KAK, husu KAK fo hatene imi dehan hau fakar osan iha ne’ebe, tanba hau responsavel ho parlamentu, imi kikoan sira bee the seidauk dois ne’e, labele koalia ho hau,” Xanana hakilar ho lian maka’as. 

 Nu’udar Xefe Governu nia haka’as an atu hadia iha fatin hotu-hotu, maibe kuandu imi sente katak, buat sira ne’e la diak hotu bele buka fatin hodi hari’i tan universidade seluk no hanorin rasik. 

.