“Ministru Turizmu Sai Turista Iha Rai Liur (3)”

.

Jornal Independente - Sesta-feira, 28 Junho 2013 

 Programa barak ne’ebe durante ne’e Ministeriu Turizmu halo barak liu halai liu ba divertimentu, ezemplu ki’ik mak hanesan Miss Timor-Leste, Karavana KUltura, Kurida Bisikleta, Tour de Timor no seluk tan. 

Foin lalais ne’e, Ministeriu Turizmu mos lansa ona programa Miss Timor-Leste 2013, programa ne’e la konsege implementa, maibe infelizmente orsamentu lubuk ida mak hotu ona ba eventu ne’e. 

Husi osan rihun $200 ne’ebe aloka ba programa ne’e tohik ona, osan barak mak hasai ona ba print-out outdoor hanesan banner no panfletu, inklui preparasaun rejistu kandidatura, konferensia imprensa no selu-seluk tan ne’ebe laiha relatoriu.

 “Osan hirak ne’e mak uza didiak karik dala ruma sei fo benefisiu ba nesesidade ema barak nian,” dehan Agustinha da Costa. 

Nune’e, Rede feto hamutuk ho komite Anti Miss Timor Leste hateten, Miss Timor-Leste hanesan, ‘Bautycontests’ haforsa stereotipu ba feto no objetivu ba passa tempu, sistema patriarchal ne’ebe forte iha Timor-Leste, uza feto hanesan objetu no propriedade husi mane, feto sira tenki bonita ba mane sira, nudar estereotipu mak sira uza. 

Miss Timor-Leste mos sei halo diskriminasaun ba feto, Governu TL ratifika Konvensaun CEDAW ne’ebe iha obrigasaun hodi halakon diskriminasaun ba feto husi forma oioin “standar a beaty” sai hanesan criteria, ne’e esklui feto seluk. 

Besik tina ida ona Governu foun ne’e harii, maibe laiha planu asaun ruma husi Ministeriu Turizmu atu oinsa dezenvolve no esplora area turizmu tuir buat ne’ebe define on aiha PEDN. 

Nune’e, lolos karik Ministeriu Turizmu tenki kria grupu servisu tekniku atu peskiza integradu nasional ba area zona industria turizmu ne’ebe iha ona PEDN. 

Suporta mos seitor edukasaun ne’ene iha relasaun ho industria turizmu hanesan, bolsu estudu, Sentru treinamentu professional, ospitalidade no otelaria, universidade no sosieade sivil ne’ebe iha ona inisiativu ba area ne’e. Ministru Kalbuadi ho nia funsionariu tomak presiza halo reflesaun oituan iha fatin turizmu hirak ne’e, atu hatene kondisaun loloos no mos oinsa bele dezenvolve infra-estrutura fatin turistika sira ne’e husi area saida. 

Maibe, difisil oituan tanba Ministru Kalbuadi laiha konsetrasaun ba servisu governu nian, tanba, Ministru rasik lori kargu lubuk ida hanesan, Ministru Turizmu, Prezidenti federasaun Timor-Leste (FFTL), Prezidneti Comite Olimpiku Nasional Timor-Leste (CONTL), tanba kargu tolu ne’ebe Ministru lori halo nia la hela metin iha Timor. 

Ministru “Halimar” barak liu iha rai liur hodi bele konvense ema estranjeiru sira atu mai vizita TL, inklui mos aproveita hodi halo misaun Federasaun Fotebal Timor-Leste (FFTL) no CONTL nian iha nasaun sira seluk.

 “Ami Ministru ne’e semana ida iha Timor, semana tolu iha estranjeiru,” dehan Funsionariu Ministeriu Turizmu neebe lakohi temi naran. 

.