Atrazu Ezekusaun: “PN Sei Altera Lei Kamara Kontas”

.

Jornal Timor Post - Tersa-feira, 25 Junho 2013 

Prezidenti Komisaun A trata ba asuntu konstitusional, Justisa Administrasaun, Poder LOkal no Anti-Korupsaun, Carmelita Moniz hateten, Ministeriu FInancas hato’o ona pareser para Parlamentu nasional atu halo alterasaun lei Kamara Kontas. 

Razaun pareser husu alterasaun lei Kamara Kontas, liu-liu relasiona atrazu ezekusaun Orsamentu Jeral Estadu (OJE) 2013 besik tinan klaran ona maibe governu foin ezekuta deit 15% husi tital OJE 2013 U$1.6 biloens, tanba tuir lei jestaun finanseiru, projeitu ho montante U$500.000 ba leten tenki hetan vustu husi Tribunal kontas, antes implementa. 

 “Lei kona-ba Kamara de kontas ne’e tama iha urjensia, ne’ebe mak uluk Parlamentu Nasional rasik aprova iha 2009, depois tenki halo primeiru alterasaun ba artigu rua ne’ebe ligadu ho ezekusaun OJE,’ Carmelita informa ba jornalista sira iha PN, hafoin plenaria, Segunda (24/6). 

Entertantu, iha plenaria PN, deputadu husi Bancada FRETILIN, Inacio Moreira mos kestiaona sistema ezekusaun orsamntu Jeral do estadu 2013 ne’ebe besik tinan klaran maibe seidauk atinji 30%, ne’e tanba estrutura V Governu mosu moda hotu sistema finansas ne’ebe governu anterior halo ona. 

“Tinan klaran ona, Ministru no Sekretariu Estadu sira ezekuta orsamentu jeral estadu 2013 maioria seidauk to’o pursentu 30, ne’e presija toma atensaun,” nia sujere.

,