Kazu Bolseiru Filipina “Hatun Dignidade TL, Me Sei La Selu Advogadu”

.

Jornal Nacional Diario - Sesta-feira, 21 Junho 2013 

Ministru Edukasaun (ME), Bendito Freitas, hateten Estadu Timor Leste sei la responsabliza orsamentu atu bele apoiu bolseirus Timoroan ne’ebe mak deskonfia halo viollensia seksual hasoru feto Filipina iha Filipina, tanba kazu ne’e hatuun dignidade no hafoer estadu no nasaun Timor Leste iha rai liur. 

Tanba ne’e, ME sei la selu advogadu hodi defende bolseiru ne’e iha Tribunal maske to’o oras ne’e bolseirus ne’e sei iha prizaun preventiva. ME, Bendito Freitas, hateten lia hirak ne’e ba Jornalista sira iha Cnetro Convencoes Dili (CCD), Kinta (20/6) hafoin partisipa enkontru Timor Leste ho Parseiru dezenvolvimentu. 

Nia hatutan, antes ne’e Primeiru Ministru (PM) Kay Rala Xanana Gusmao akompania husi Ministru Edukasaun halao ona vizita ba Timoroan sira ne’ebe maka iha Filipina inklui mos estudante no Bolseirus Timoroan iha nasaun refere. Durante vizita PM Xanana ba Filipina, xefi Governu ne’e aviza ona ba estudante no bolseirus Timoroan sira iha Filipina atu halo tuir regras rai nasaun refere nian no kontinua hatudu komportamentu diak. 

 ME Bendito Freitas esplika liu tan katak, bolseiru Timoroan ho naran inisial MAC ne’ebe mak komete krime iha Filipina ne’e laos foin dala ida maibe ho kazu ne’e ba dala rua ka dala tolu ona husi bolseiru Timoroan ne’e rasik, wainhira MAC sei iha Timor Leste. 

 “Kazu ne’e laos kazu uniku, maibe kazu ne’e hanesan kazu ida ne’e segundu no terseiru, kazu husi ema ne’ebe hanesan, tanba ne’e mak hau vizita ofisial ba Filipina no mos PM, PM koalia maka’as ba sira hotu katak, mai iha ne’e se mak la kumpri fila ba Timor, PM rasik sei fo sansaun ba sira ne’ebe mak la kumpri iha ne’eba,” esplika ME, Bendito Freitas. Tanba ne’e, Estadu Timor-Leste sei hein deit wainhira maka bolseiru Timoroan ho naran inisial MAC ne’e fila mai Timor Leste, tanba kazu ka eru ne’ebe maka nia komete ne’e pessoal ninian no la involve Estadu Timor Leste nia naran. 

Bolseiru Timoroan ho naran inisial MAC ne’e, deskonfia halo violasaun sexual hasoru feto Filiina iha Filipina, tanba ne’e oras ne’e dadauk iha hela prizaun preventiva hodi prosesu julgamentu tuir lei rai ne’eba nian. 

Iha prosesu julgamentu ne’e mos bolseiru Timoroan ne’e presiza osan hodi selu advogadu, nune’e bele defende Timoroan ne’e iha Tribunal, maibe Estadu Timor Leste liu husi Ministeriu Edukasaun sei la haruka osan selu advogadu hodi defende nia iha Tribunal. 

,