Membru Governu Atraza; “PM Xanana Taka Portaun”

.

Jornal Timor Post - Sabadu, 15 Junho 2013 

Primeiru Ministru (PM), Kay Rala Xanana Gusmao, Sesta (14/06), taka portaun ba membru Governu sira tamba mai atraza iha inkontru ekxtraordinariu konsellu Ministrus ne’ebe hala’o iha Ministeriu Negosiu Estrnajeirus no Kooperasaun (MNEK), Impaktu husi ne’e halo membru Governu sira hein de’it iha portaun liur durante oras ida nia laran. 

“Ami informa ba jornalista sira, Primeiru Ministru taka portaun ba membru Governu sira, agora Ministru no Sekretariu Estadu Katuas PM Xanana tahan hela iha portaun liur,” informa Ponte konfirmadu iha Ministeriu Negosiu estranjeirus no kooperasaun (MNEK) ba Timor Post, sesta (14/6). 

Reasaun Primeiru Ministru nian ne’e inkontru Konsellu Ministru extraordinariu ne’ebe maka loloos hala’o iha oras 08:30 Otl, maibe iha membru Governu sira seidauk mosu hotu. Tanba ne’e, iha oras hela minutu balun atu tama ba tuku 09:00 Otl, dader xefe Governu aviza ba protokolu hodi fo hatene seguransa sira atu taka tiha portaun boot MNEK nian. 

Tuir observasaun no informasaun husi parte seguransa sira katak, kareta membru Governu sira ne’ebe atraza maka kareta ho numeru patrikula 00.034, 00.36, 00.28, 00.051, 00.54, 00.55, no 00.48. “Kareta sira ne’e mak ohin mai ‘terlambat’ (tarde) ne’ebe mak tahan tiha iha ne’e, membru governu sira hamrik iha nee kuaze oras ida resin, depois mak katuas (PM Xanana-red) haruka dehan tama fali,” haktuir seguransa ne’e ba Timor Post. 

Tuir seguransa sira katak, hafoin xefe governu bolu tiha nia soldadu hirak ne’ebe maka atraza tama tiha laran, komprementa ba xefe governu, maibe xefe governu lakohi hata’an, tanba atetude membru governu sira la kumpri tempu hodi tuir enkontru konsellu Ministru. 

 “Ami haree sira tama husu Bondia ba primeiru Ministru, Primeiru Ministru la hata’an ida, katuas fuma hele la pusing sira, sira mos la’o nonok ho oin buis ba tur iha fatin sira ne’ebe maka preparadu,” fonte ne’e haktuir. 

Atetude membru Governu la’os foin akontese maibe akontese ne’e iha IV Governu Konstitusional, Xefe Governu taka ona odamatan ba membru governu sira ne’ebe mak la kumpri orariu. Hafoin tama V Governu Konstitusional akontese mos dala ida iha Ministeriu Financas nia edifisiu, membru Governu sira atraza no kadeira no meza sira la haloot, nune’e, xefe Governu mak diretamente forma kadeira no meza sira. 

.