‘Mafia’ Projeitu Iha PN, “KAK Konfirma Dadus Ba Deputadu Osorio”

.

Jornal Nacional Diario - Kinta-feira, 20 Junho 2013 

Investigador husi Komisaun Anti Korrupsaun (KAK), Tersa Loraik, hasou malu ho membru Bancada FRETILIN, Osorio Florindo, hodi husu konfirmasaun dadus kona ba kazu abuzu de poder ho korrupsaun ne’ebe mak deputadu ne’e levanta liu husi deklarasaun Politika Bancada FRETILIN nian iha plenaria, foin lalais ne’e. 

 “Iha deklarasaun politika ne’ebe hau halo hodi reprejenta Bancada FRETILIN iha Parlamentu Nasional (PN) koalia konaba prosesu aprovizionamentu, jestaun, abuzu poder no korrupsaun iha PN, tanba ne’e mak KAK mai husu konfirmasaun no dokumentus sira ne’e hau fo hotu ona ba KAK,” informa deputadu Osorio Florindo ba JNDiario iha PN, Kuarta (19/6). 

 Osorio Florindo hateten, dokumentus ho dadus hotu ne’ebe mak nia levanta iha plenaria, inklui foto balun fo hotu ona ba investigador KAK, inklui P.O hamutuk 28 ne’ebe la iha kontratu maibe halo pagamentus no selu tiha ona mos sasan la tama iha Parlamentu Nasinal (PN). 

 “KAK rona no lee iha media maka sira mai investiga hau no hau fo tiha ona dokumentus sira ne’e ba hotu KAK,” Hateten Osorio Florindo. 

Deputadu husi Bancada FRETILIN ne’e hatutan tan katak, nia iha ekipa boot ida iha PN neebe mak apoiu nia hodi sai dokumentus sira ne’e, tanba ne’e mak nia mos fo tiha ona identidade ho numeru telefone kolega sira ne’ebe mak fornese dadus sira ne’e ba KAK atu KAK bele bolu sira hotu hodi submete ba investigasaun ne’ebe mak klean liu tan.

 Osorio duvida boot tanba iha P.O 28 ne’ebe mak la iha kontratu ho kompanha no haruka aprovizionamentu selu, maibe sasan sira ne’e sai tiha ‘mate klamar’ buka la hetan. “Hau admira boot sasan pengadaan sira ne’e iha pagamentu hotu, maibe sasan la iha PN, ironi liu tan, sasan balun hamrik fali iha Xefe IT nia uma,” hateten Osorio Florindo. 

La’os ne’e de’it, Deputadu Osorio Florindo esplika, iha sasan balun ne’ebe nia folin U$700 ou U$800, maibe hasa’e tiha fali ba U$ 20.000, ironi liu, mesmu hasa’e tiha sasan nia folin, maibe sasan ne’e la tau iha PN. 

Nune’e, Osorio Florindo rekomenda ba KAK atu halo investigasaun ne’e profundu no labele ba ema ida de’it, maibe tenke investiga Sekretariu Jeral, Diretor Financas, Diretor IT ho Xefi Logistika iha PN, basa, iha projeitu pengadaan sasan balun ne’ebe aprovizionamentu lakohi selu tanba laiha kontratu, maibe sekretariu Geral hasai despaisu hodi obriga tenki selu. 

 “Se sira la selu mak sekretariu Jeral sei foti medidas seluk, ne’e hau interpreta katak, Secjer bele selu diretamente ou bele hasai sira,” deklara Osorio. 

Iha projeitu balun, tuir Osorio Florindo katak, lori mos deputadu sira nia naran, exemplu iha informasaun balun dehan, semana-semana hatam Coca-Cola ou sagiko Kaixa 20 ba deputadu sira, maibe realidade, Deputadu sira loro-loron hemu bee Aqua ka Aquase. 

Informasaun ne’ebe deputadu ne’e simu mos katak, kapasidade armazen PN nian ne’e fulan ida sosa sasan U$ 10.000 nakunu ona, maibe fulan-fulan hasai U$ 500.000 ba kompra sasan sira ne’e iha nebe hotu. Iha sorin seluk mos, kona ba sistema rekursu humanus nian iha PN, ne’ebe tuir deputadu Osorio katak, sasan sira ne’e sosa besik to’o ona U$ 200.000, maibe la iha rezultadu, atu dehan deit katak, internet iha PN ne’e 5 MB, maibe agora internet mos laiha tiha ona. 

 “Mafia ne’ebe la’o iha PN ne’e tenke sobu, se la’e estadu sei lakon osan barak, hau husu ba Sekretariu Jeral foun, Mateus Belo, atu matan moris no neon nain, tanba ‘mafiozu’ sira ne’e bele halimar no halo kontratu foun ho data antigu nian,” afirma Deputadu Osorio Florindo. 

,