“Koko Matenek Xanana ‘Sadik’ UNDIL”

.

Jornal Nacional Diario - Sesta-Feira, 14 Junho 2013 

Primeiru Ministru Kay Rala Xanana Gusmao sadik Estudante Universidade Dili (UNDIL) atu koko matenek maske Xanana Gusmao nia kursu eskola SMA de’it. 

Xefi do Governu ne’e hateten, Universidade fatin atu aprende e buka matenek laos atu hatudu Forca, tanba ne’e lalika halo politika iha Universidade nia leet antes akaba estudu iha Universidade. 

“Sai husi Universidade ba forma Partidu, hau SMA, imi universidade, ita sukat tok, hau SMA maibe hau ba halo palestra iha universidade boboot ne’ebe hau la tauk imi, hau mai iha BOAKRIL laos atu manan osan atu sai Prezidenti, osan ne’ebe mak hau fob a BOAKRIL ne’e hau nia osan,” Primeiru Ministru Xanana Gusmao sadik estudante UNDIL bainhira hato’o nia deskursu nuudar Prezidenti fundasaun BOAKRIL ba estudante UNDIL, iha UNDIL, Kinta (13/6). 

Xanana Gusmao realsa, estetmentu ne’e relasiona ho loron hirak liu ba estudante UNDIL organiza asaun iha Universidade hasoru estrutura Universidade ho Fundasaun BOAKRIL. Nudar Prezidenti Fundasaun, Xanana Gusmao haktuir, ba se-se deit lalika koalia politika bainhira Xanana Gusmao sei moris, tanba atu sukat oin nusa ba mos iha Timor Leste la iha ema ida mak bele sukat Xanana Gusmao ba saida deit. 

 “Hau mate tiha imi koalia ba, imi mak bok tan iha ne’e, hau mai kaer imi,” Xanana Gusmao ameasa. Xanana Gusmao mos kontinua hateten, dadaun ne’e UNPOL la iha ona,”Hau la tauk imi, lalika hanoin Universidade bele hatun governu, se imi halo ida ne’e hau sunu tiha imi,” dehan Xanana. 

Xanana Gusmao mos husu atu hahu agora ba oin estudante tomak UNDIL nian la iha ona ema ida atu halo manifestasaun, se hakarak halo manifestasaun bele sai husi Universidade, tanba UNDIL nudar Universidade Privadu ne’ebe mak iha regulamentu, laos arbiru deit. 

Tuir Prezidenti Universidade ne’e, Universidade hari’i atu eduka ema sai sidadaun foun laos hanorin ema sai muturabu, tanba ne’e bainhira hatudu muturabu iha UNDIL Xanana Gusmao sei fo estudante hirak ne’e nia naran ba universidade hotu-hotu iha Timor Leste atu labele simu sira nia prezensa wainhira sira kontinua hakarak ba eskola. 

“Universidade la’os atu kria kriminozu, maibe atu kria sidadaun foun, tanba ne’e atu sai sidadaun foun tenke respeita sasan ema nian, kuandu la gosta Universidade ne’e, sai deit,” PM xanana fo hanoin. Xanana Gusmao Kontinua gava an hodi hatutan ho lian maka’as katak, 

“Hau hateten ba imi, hau bangga ho hau nia SMA ne’e, maibe hanesan imi labele book hau, imi hakarak eskola iha Universidade ne’e bele kontinua, maibe kuandu lakohi agora dadaun bele sai ba buka Universidade seluk ne’ebe hanorin imi diak liu, liafuan ida traidor ne’e at liu ba hau, tanba hau mak lori funu ne’e mai, se imi dehan hau gasta osan, imi bele lori hau ba KAK, husu KAK hodi fo hatene imi dehan hau fakar osan ne’ebe, tanba hau responsavel ho Parlamento, imi kiak oan sira be te seidauk dois ne’e, labele koalia ho hau,” Xanana koalia ho hirus. 

Hafoin problema akontese iha UNDIL aktividade aprendizazen paradu tiha iha loron hirak nia laran, nudar Prezidenti Fundasaun intervensaun xanana Gusmao nian husu atu loke hikas prosesu aprendizazen, bainhira iha tan asaun anarkismu iha UNDIL, Xanana Gusmao rasik sei ba kaer estudante hirak ne’e atu hatama iha komarka. 

Nuudar Aman, xanana mos enkoraza mos estudante UNDIL atu estuda maka’as, kuandu hakarak sai lider iha futuru, tanba iha buat barak mak presija sira atu hatene, kuandu hakarak sai politika nain ba rai ida ne’e. 

Entertantu, Estudante UNDIL Mario Maubere konta tuir katak, problema Universidade mosu tanba tuir observasaun husi estudante durante Universidade hari’i klibur estudante atu ejiji ba lideransa universidade nia responsablidade. 

“Ami nia ezijensia principal liu mak ne’e, hari’i laboratorium ba estudante sira, tanba estudante fakuldade tekniku presija pratika, lalika aprende teoria deit, se teoria deit bainhira akaba estudu nia kualidade sei zero,” Mario Maubere haktuir. 

Problema seluk mak estudante hakarak hatene orsamentu neebe gabinete Primeiru Ministru tulun ba UNDIL nia utilizasaun ba saida, tanba realidade hatudu mosu relatoriu falsu. “Ba hau senti katak, buat ne’e mak ohin Primeiru Ministru koalia ne’e, nia senti katak buat hotu-hotu nia manda, tuir lolos ne’e fo tempu ba estudante sira atu koalia, labele rekomenda buat hotu,” Mario maubere lamenta. 

Nune’e mos Salvador da Costa, Fakuldade Engeneira Departementu Petrolium hateten katak, sira senti kontenti ho tebes ho Prezensa Primeiru Ministru nian ne’ebe hanesan mos Prezidenti BOAKRIL UNDIL, hodi fo reposta ba sira nia ejizensia ne’ebe durante ne’e sira infrenta. 

Maske nune’e, sira triste tanba depois to’o tiha iha UNDIL, Xanana Gusmao koalia fali buat ne’e maka la relevante ho ezijensia estudante nian durante ne’e. Iha Dialogu entre Prezidenti Fundasaun BOAKRIL Xanana Gusmao ho nia estrutura mos dezintentendementu kiik oan husi estudante UNDIL tanba la iha seksaun husu no hatan, maibe problema refere rejolvidu bainhira hetan intervensaun husi Komandante PNTL Distritu Dili Pedro Belo ho nia membru. 

.