Maijen Lere: “Arte Marsiais Lalika Koko Estadu”

.

Jornal Nacional Diario - Tersa-feira, 25 Junho 2013 

Xefi Estadu Maior Jeneral (Maijen) FALINTIL-Forca Defeza Timor-Leste (F-FDTL) Maior Jeneral, Lere Anan Timur, deklara artemarsiais lalika koko Estadu, tanba Estadu laos organizasaun Naun Govermental (ONG) ne’ebe imi atu Koko. 

“Hau hatete ba sira (Artemarsiais-red) nia nain ulun nain liman ne’ebe mak uluk ba hasoru hau, imi (arte marsiais) lalika koko ho Estadu, Estadu ne’e la’os ONG ida ka suku ida ka Aldeia ida be imi koko,” Maijor Jeneral Lere Anan Timur, deklara ba Jornalista sira iha Kuartel Jeneral F-FDTL, Fatuhada, Dili, Segunda (24/6) relasiona ho situasaun iha Beto Suku Komoro, Sub Distritu Dom Aleixo, Distritu Dili, ne’ebe artemarsiais balun komesa ativu fali ona hodi provoka situasaun. 

Eis veteranu ne’e hateten, arte marsiais ne’ebe mak hakarak halimar ho estabilidade, maibe Estadu iha kompetensia no dirietu atu kaer ema ne’ebe mak kria instabilidade rai laran. 

 “Sira hanoin sira haksoit tu’un sae ne’e kalan ba baku tuku, asalta ema nia uma, ne’e aban bain rua sira sei lori konsekoensia balun ba para iha Hospital, kadeia, ne’e mak sira nia fatin no balun ba para iha semiteriu ne’e ba,” hateten Lere. 

Lere haktuir, nia parte rona ona informasaun balu ne’ebe mak iha katak, parte area Beto, Comoro, ne’e artemarsiais komesa ativu fali ona liu-liu grupu organizasaun balun iha area Beto ne’eba. 

Nudar instituisaun Lutu ba nasaun, Lere Anan Timur, husu ba Joven sira ne’ebe mak foin tinan 15 to’o 23 atu labele envolve no kria konflitu hodi labele prejudika futuru sira ninian rasik. 

Iha fatin lahatensan komandu Jeral PNTL Komisariu Longuinhos Monteiro hatete, konaba seguransa, lao diak iha Distritu 13, maibe iha Distritu Suai mak akontese dezastre naturais afeita ba ita nia komunidade estragus materiais barak. 

 “Ita nia perezensa Polisia iha bairo halo aproximasaun diak liu tan area ne’ebe mak sai tendensia konflitu, sira mos relata situasaun iha terenu no halo preparative buat ne’ebe sei mosu iha oin,” hateten Komisariu Longuinhos Monteiro.

,